Փաստ ինֆո

«2008-ին ունեինք քրեական օրենսգրքում մի հոդված, որը կոչվում էր «պետական իշխանությունը յուրացնելը» (300), իսկ այսօր կա երկու հոդված՝ «իշխանությունը յուրացնելը» եւ «սահմանադրական կարգը տապալելը» (300.1),-այսօր «Մարտի 1-ի գործը հետհեղափոխական Հայաստանում» տեղեկատվական կոնֆերանսի ժամանակ նշեց Ռոբերտ Քոչարյանի պաշտպաններից Արամ Օրբելյանը՝ անդրադառնալով այն հոդվածին, որով պատասխանատվության է կանչվել ՀՀ 2-րդ նախագահ Ռոբերտ Քոչարյանը:

Օրբելյանն ասաց, որ 2008-ին «սահմանադրական կարգը տապալելը» վերնագրով հոդված չի եղել քրեական օրենսգրքում. այս հոդվածն ուժի մեջ է մտել 2009-ի մարտի 18-ին՝ Մարտի 1-ից հետո մեկ տարի եւ 17 օր հետո։ «Որպեսզի քրեական իրավունքով մարդուն հնարավոր լինի «իքս» հոդվածով դատել, անհրաժեշտ է, որ այն գործողությունը, ինչի համար իրեն դատում են՝ ժողով անել, հրամանագիր ստորագրել, լինի հանցագործություն այդ գործողության պահին՝ փետրվար-մարտ ամիսներին եւ գործի նաեւ քննության ժամանակ, այսինքն, այսօր»,-բացատրեց փաստաբանը:

Օրբելյանը նկատեց, որ 300-րդ հոդվածը՝ նախկին ձեւակերպումներով հանցագործություն չի եղել եւ չի կարող կիրառվել։ «Փորձ է արվում ասել, որ այսօր գործող 300.1-րդ հոդվածն իրականում 2008-ին գործող 300-րդ հոդվածի մի կտորը վերցրել, առանձնացրել, սարքել են առանձին հանցագործություն»,-նշեց նա: Օրբելյանը հղում արեց ԵԽ Մարդու իրավունքների հանձնակատարի հայտարարությանը ու նշեց, որ համազեկուցողն ասել է՝ այս հոդվածն այնպես է գրված, որ մարդը կարդում, չի հասկանում՝ ինչ անի, ինչ չանի, այսինքն, հոդվածը կա, բայց չկա։

Արամ Օրբելյանը հիշատակեց նաեւ հայտնի «7-ի գործով» այդ առնչությամբ հնչած կարծիքները։ Փաստաբանը նշեց, որ տվյալ հոդվածից չի հասկացվում, թե որ գործողությունն է «սահմանադրական կարգի տապալման» հոդվածի տակ ընկնում։ Նա նշեց, որ մեղադրանքի 20 էջերում գրված տեքստից դա չի հասկացվում, ուստի դատավոր Գրիգորյանը դիմել է ՍԴ, իսկ ՍԴ-ն էլ ՄԻԵԴ եւ Վենետիկի հանձնաժողով։

Օրբելյանը շեշտեց՝ 300.1-րդ հոդվածը 300-րդ հոդվածի հետ ոչ մի առնչություն չունի: «Երբ դատախազը շատ վստահ դատարանում ասաց՝ ոչ մեկը չի կարող վիճել, որ 2008 թվականին սահմանադրական կարգը տապալելը հանցագործություն չի եղել, այսօր հանցագործություն է, ես պնդում եմ, որ ես եմ այն անձանցից մեկը, որ վիճում է, ես պնդում եմ, որ ոչ 2008-ին , ոչ այսօր սահմանադրական կարգը տապալելը հանցագործություն չէ»,-հայտարարեց Արամ Օրբելյանը։
Արամ Օրբելյանը խոսեց նաեւ հետադարձ ուժի խնդրից։

 Մանրամասները՝ տեսանյութում

Աղբյուր` Փաստինֆո