Փաստ ինֆո

Առողջապահության նախարարության փակ աշխատանքի պայմաններում՝ ՀՀ առողջապահության պատմության մեջ առաջին անգամ տնօրենի փոփոխությունն ուղեկցվեց ոստիկանության ներգրավմամբ։ Այս մասին հրավիրված ասուլիսին ասել է «Կոնսիլիում» ՀԿ նախագահ Գեւորգ Գրիգորյանը:

«Այսինքն՝ ոստիկանությունը և բժիշկը միշտ բարիկադների նույն կողմում են, որովհետև իրենք ապաքաղաքական են։ Իրենք սպասարկում են թե՛ իշխանությանը, թե՛ ընդդիմությանը, բուժում են թե՛ իշխանությանը, թե՛ ընդդիմությանը, պաշտպանում են թե՛ իշխանությանը, թե ՛ ընդդիմությանը, բայց, երբ ոստիկանին բերում են, որ բժշկին բերման ենթարկի, այն էլ նրա համար, որ ուղղակիորեն նախարարի ապօրինի հրամանը չի իրականացնում։ Դա չլսված բան էր։ Ուր ենք հասել՝ մեր ոլորտային քաղաքականության սխալ ուղղությամբ, որ արդեն դրան ենք գնում։ Բերիայի մեթոդը կիրառելու համար, պետք է Բերիայի ուղեղն ունենալ։ Առանց Բերիայի ուղեղի՝ Բերիայի մեթոդը կիրառելը, բերելու է շատ լուրջ խոչընդոտների մեր առողջապահության ոլորտում։ Այս ռեպրեսիաները, որոնք կիրառվում են բժիշկների նկատմամբ, երկար տևել չի կարող»,- նշեց «Կոնսիլիում» ՀԿ նախագահը։

Ըստ նրա՝ ՁԻԱՀ-ի կանխարգելման կենտրոնի աշխատակիցները մեկ տարի է , ինչ առաջարկում են մասնագիտական քննարկում կազմակերպել իրենց կենտրոնն ու Նորքի ինֆեկցիոնը միավորելու նախարարության նախաձեռնության շուրջ, ինչից նախարարությունը խուսափում է։

«Որևէ ապօրինի բան չեն առաջարկում, որևէ անձնավորված շահերի պաշտպանում չեն առաջարկում, որևէ նման խնդիր գոյություն չունի։ Առաջարկում են զուտ քննարկում։ Այսինքն՝ մարդիկ վստահ են, որ իրենց մասնագիտական փորձն այնքան է թույլ տալիս, որ կարող են հստակ փաստարկներ բերել, որ նախարարի որդեգրած քաղաքականությունը՝ ՁԻԱՀ-ի կանխարգելման հանրապետական կենտրոնը և Նորքի ինֆեկցիոն կլինիկայի միացնելու ուղղությամբ իրատեսական չէ և պարունակում է ռիսկեր »,- ասաց Գրիգորյանը։

Վերջինս նշեց, որ ԱՆ-ն չի համաձայնում քննարկում իրականացնել մասնագետների հետ։

«Քննարկում իրականացվում է նեղ խմբի հետ՝ անտեսելով մասնագետներին։ Բժիշկներին որքան պետք է հասցնեն, որքան պետք է բժիշկների խոսքն արհամարհեն, որ նրանք գան Կառավարության մոտ՝ ցույցի։ Երբևիցե նման բան լսել եք՞։ Ես չեմ լսել՝ իմ գիտակից կյանքում։ Երբևէ տեսե՞լ եք, որ բժիշկները կոլեկտիվ աշխատանքից ազատման դիմում գրեն»,- ասաց Գրիգորյանը։

Նրա խոսքով՝ Առողջապահության նախարարության աշխատաոճը խիստ փակ է, ԱՆ աշխատաոճը կայանում է միանձնյա որոշումներ կայացնելու մեջ և իր որոշումը բժիշկներին կայացնելու մեջ։

«Մարդիկ փաստում են, որ այսօր իրենց վրա գործադրվում են ճնշումներ»,- ասաց Գրիգորյանը՝ նշելով, որ նման ճնշումները վերաբերում են գրեթե բոլոր հիվանդանոցներին։

Գրիգորյանը կոչ արեց գործադիր իշխանությանը՝ բժիշկների հետ այդպես չի կարելի վերաբերվել և բժշկի խոսքն արհամարհել։

Աղբյուր` Փաստինֆո