Փաստ ինֆո

Փետրվարի 26-ի տվյալների համաձայն աշխարհում արդեն 37 երկրում արձանագրվել են կորոնավիրուսով վարակվածության դեպքեր։ Կառավարության այսօրվա նիստի ժամանակ այս մասին հայտարարեց Առողջապահության նախարար Արսեն Թորոսյանը։

«Ընդհանուր 81109 հաստատված դեպք է արձանագրվել, որից 78191-ը Չինաստանում և որից մահվան ելքով են 2718-ը»,-ասաց Արսեն Թորոսյանը։ Վերջինս ընդգծեց, որ Հայաստանում կորոնավիրուսով վարակված գրանցված որևէ դեպք չկա։

Նախարարի խոսքով ծանր դեպքերը մոտ 5 տոկոսի շրջանակներում են, որոնք բժշկական օգնություն են պահանջում։

ՀՀ վարչապետ Նիկոլ Փաշինյանը հետաքրքրվեց. «Այսինքն դեպք կա, որ մարդը կարող է կորոնավիրուսով վարակվի, թեյ, սուրճ կամ օղի խմի, հաջորդ օրը վեր կենա..»։

Արսեն Թորոսյանն էլ վարչապետի հարցին ի պատասխան նշեց, որ դա մի կողմից դրական է, մյուս կողմից էլ բացասական, երբ հայտնաբերելիության առումով որպես դեպք չի լինում դիտարկել։

Անդրադառնալով տարածաշրջանում տիրող իրավիճակին՝ նախարարն ասաց, որ Իրանի Իսլամական Հանրապետությունում վերջին պաշտոնական տվյալներով արձանագրվել է 139 դեպք, որից 19-ը մահվան ելքով. «Վերջին ինֆորմացիան երեկ երեկոյան Վրաստանում արձանագրված մեկ դեպքն էր։ Առավոտյան խոսել եմ իմ գործընկերոջ հետ։ Նրա հետ շփված անձանց մոտ թեստը բացասական է ցույց տվել, և նրանք մեկուսացվել են, որպեսզի երկու շաբաթվա ընթացքում կա՛մ կդառնան վարակակիր, կա՛մ առողջ ահամրվելով՝ դուրս կգրվեն»,-նշեց Արսեն Թորոսյանը։

Վերջինս համարում է՝ Վրաստանում մեկ դեպքի արձանագրումով համաճարակաբանական իրավիճակն էական չի փոխվել։
Վարչապետն էլ նկատեց՝ գործնականում Վրաստանում վարակվելու դեպք չունենք, դա դեպք է։

Առողջապահության նախարարը նաև տեղեկացրեց, որ մինչ օրս կատարվել է 95 հետազոտություն բոլոր պոտենցիալ կասկածելի դեպքերին, որոնցից բոլորը բացասական են եղել. «Ներկայումս ունենք 850 հետազոտության թեստ և ևես 3000 թեստ շուտով կստանանք։ Պրակտիկորեն հնարավոր ամեն ինչ արվում է, որ վարակի ներթափանցումը Հայաստան կանխվի։ Չնայած այն շատ քիչ է տարբերվում օրինակ H1N1-ից, որն ազատ շրջանառվումէ ամբողջ աշխարհում»,-հավելեց նախարարը։

Աղբյուր` Փաստինֆո