Փաստ ինֆո

Կոտայքի մարզում ամուսնուն դանակահարելու մեջ մեղադրվող կինը չի ազատազրկվի։ Ճիշտ է, դատարանը հիմնավորված համարել է առաջադրված մեղադրանքը, բայց որոշել է պատիժը պայմանականորեն չկիրառել՝ սահմանելով փորձաշրջան 2 տարի ժամկետով։

Ամուսինների միջեւ վիճաբանությունը եղել է պարբերաբար, որի հիմնական պատճառը եղել է ալկոհոլը։ Դեպքի օրը ամուսինը եւս խմած է եղել ու վիճել կնոջ հետ, հայհոյել, ապտակել, հանել դանակը ու պահանջել, որ կինը տանից հեռանա։ Կնոջը հաջողվել է ամուսնու ձեռքից վերցնել դանակը, պահանջել, որ հանգստանա՝ նշելով, որ երեխաները ամաչում են նրա վարքագծից։

Ամուսինն էլ նստել բազկաթոռին և շարունակել վիրավորական արտահայտություններ հնչեցնել կնոջ հասցեին։ Դատավճռի համաձայն՝ չհանդուրժելով ամուսնու պահվածքը՝ կինը ձեռքերում գտնվող դանակով մեկ անգամ հարվածել է բազկաթոռին նստած ամուսնու որովայնին, որի հետեւանքով դատաբժիշկների գնահատմամբ, պատճառվել է ծանր մարմնական վնաս:

«Փաստինֆո»-ի հաղորդմամբ՝ դեպքի առթիվ հարուցվել է քրեական գործ, որի շրջանակներում կնոջը մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ ուրիշին մարմնական վնասվածք պատճառելու համար, իսկ ամուսինը ճանաչվել է որպես տուժող։

Գործը մեղադրական եզրակացությամբ ուղարկվել է դատարան։ Դատաքննությունը կատարվել է արագացված կարգով. Կինն ընդունել է մեղադրանքը, իսկ ամուսինը՝ դեպքից մոտ մեկ ամիս անց մահացել է։ Կոտայքի ընդհանուր իրավասության դատարանը՝ դատավոր Գ. Մարգարյանի նախագահությամբ, գտել է, որ ամուսինների միջև վիճաբանությունն առաջացել է հենց տուժողի դրսևորած վարքի հետևանքով։ Դատարանը մեղավոր է ճանաչել Հ. Առաքելյանին՝ նշանակելով պատիժ ազատազրկում՝ 3 տարի ժամկետով։ Դատարանը նաև արձանագրել է, որ կան մեղմացուցիչ հանգամանքներ և նա ամբողջությամբ ընդունում է իր մեղքը, ուստի որոշել է չկիրառել նշանակված պատիժը ՝ սահմանելով փորձաշրջան 2 տարի ժամկետով։

Նշենք, որ համատեղ կյանքի ընթացքում ամուսիններն ունեցել են երեք երեխա, որոնցից մեկը դեպքի ժամանակ եղել է անչափահաս։

Աղբյուր` Փաստինֆո