Փաստ ինֆո

Սահմանադրական հանրաքվեի «Այո» քարոզչական կողմի լոգոն, պարզվում է, նոր չէ մտածված։ Իրավապաշտպան, «Ոչ» քարոզչական նախաձեռնության անդամ Արսեն Բաբայանը Ֆեյսբուքում 90-ականների մամուլից մի լուսանկար է հրապարակել, որը 1991 թվականի անկախության հանրաքվեի «Այո»-ի քարոզն է ներկայացնում։ Լուսանկարում զանգի մեջ պատկերված «Այո»-ն կրկնում է «Այո» քարոզչական կողմի՝ օրերս հրապարակած լոգոյի «Այո»-ն։

«Երբ քննադատում եմ, ասում եմ վերադարձել ենք 90-ականներ, նեղանում եք։ Արդեն հավանաբար չեք էլ փորձում թաքցնել։ Բայց 3 միլիոնը շա՞տ չէր այս «գողության» համար»,-լուսանկարին կից գրել է Արսեն Բաբայանը։

Նշենք, որ նախօրեին Դվին հյուրանոցային համալիրում սահմանադրական հանրաքվեի «Այո»–ի շտաբի կազմակերպած դրամահավաքի ընթացքում հայտարարվեց լոգոյի մրցույթի հաղթողը։ «Այո» քարոզչական կողմի շտաբի պետ, տարածքային կառավարման և ենթակառուցվածքների նախարար Սուրեն Պապիկյանը ներկայացրեց հաղթող «Այո»-ի տարբերանշանը՝ հայտարարելով, որ հաղթողը ստանում է 3 մլն դրամ մրցանակ:

Պապիկյանն ասել էր, թե ընտրությունը բավական բարդ է եղել, երկար քննարկելուց հետո են որոշել առաջին հորիզոնականը՝ «Garօօn Agency» կազմակերպությանը։ «Այո» քարոզչական կողմի հայտարարած մրցույթին, ըստ շտաբի պատասխանատուի, 200-ից ավելի քաղաքացի էներկայացել։ 3-րդ հորիզոնականը զբաղեցրած մասնակիցը ստացել է 1 մլն դրամ, իսկ 2-րդը ՝ 2 մլն դրամ:

90-ականների մամուլում տեղ գտած տարբերանշանի ու սահմանադրական հանրաքվեի «Այո»-ի տարբերանշանի կրկնության խնդրի շուրջ «Փաստինֆո»-ն փորձեց պարզաբանում ստանալ Սուրեն Պապիկյանից, վերջինս սակայն, չպատասխանեց մեր զանգերին։

«Սփյուռ» տեղեկատվական համակարգի միջոցով փորձեցինք կապ հաստատել մրցույթը հաղթած ընկերության հետ։ «Սփյուռ» -ում գրանցված «GAROON AGENCY» ընկերության հեռախոսահամարը, սակայն, անհասանելի էր։

Հիշեցնենք, փետրվարի 16-ին վարչապետ Նիկոլ Փաշինյանը ֆեյսբուքյան իր էջում գրառում էր կատարել՝ կիսվելով «ԱՅՈ» ֆեյսբուքյան էջի հայտարարությամբ, որով «Այո»-ի բրենդինգի բաց մրցույթ էր հայտարարվում: Մասնակցեք եւ հաղթեք:

«Սահմանադրական բարեփոխումների շրջանակում «Այո»-ի շտաբը հայտարարում է «Այո»-ի քարոզչական բրենդինգի բաց մրցույթ։ Մրցույթի շրջանակում հարկավոր է ստեղծել․
1. «Այո»-ի լոգո

2. Բաների, սքրոլերի դիզայն

3. Ֆլայերների դիզայն

4. Facebook-ի համար նախատեսված cover նկար

5. Facebook-ի համար նախատեսված profile նկար

6. Facebook-ի համար նախատեսված շրջանակ

Առաջարկներ կարող ներկայացնել բոլոր հետաքրքրված անհատները և կազմակերպությունները: Առաջարկները տեղադրվելու են ԱՅՈ ֆեյսբուքյան էջում, ինչպես նաև դրանք կարող են հանրայնացվել հեղինակների կողմից:

Առաջարկները հարկավոր է ուղարկել [email protected] էլ. փոստի հասցեին: Մրցույթի արդյունքները կամփոփվեն փետրվարի 25-ին: Հաղթող մասնակցին ընտրելու է ԱՅՈ-ի շտաբը:

1-ին տեղ՝ 3 միլիոն դրամ

2-րդ տեղ՝ 2 միլիոն դրամ

3-րդ տեղ 1 միլիոն դրամ»,-նշված էր հայտարարության մեջ։

Աղբյուր` Փաստինֆո