Փաստ ինֆո

Իրավաբանական մոտեցում ցուցաբերելու դեպքում կարող է միայն մեկ որոշում կայացվի՝ ՀՀ երկրորդ նախագահ Ռոբերտ Քոչարյանի նկատմամբ  պետք է քրեական հետապնդումը անհապաղ դադարեցվի։ Այս մասին «Փաստինֆո»-ին տված հարցազրույցում ասել է  ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը՝ անդրադառնալով Ռոբերտ Քոչարյանի նկատմամբ քրեական հետապնդումը դադարեցնելու մասին միջնորդությանը, որը քննարկելու համար դատարանը հեռացել է խորհրդակցական սենյակ։

«Այլ գործոնների ազդեցությունն ինչքան մեծ կլինի և ինչքանով քիչ է հավանական, որ դատավորը կարողանա իր մեջ հաղթահարել իր վախը՝ ներկա քաղաքական իշխանություններից և կայացնել արդարացի որոշում, ապա այստեղ ես չէի ուզի կանխատեսումներ անել»,- ասաց Ալումյանը՝ հավելելով, որ դատական նիստին հորդորել են  դատավորին օրինական որոշում կայացնել, թեեւ  հասկանում ենք իր հոգեվիճակը և, թե ինչ ճնշումների կարող է ենթարկվել ։

Ավելի վաղ հայտնել ենք, որ Ռոբերտ Քոչարյանի պաշտպանական թիմը նախապատրաստել է նոր միջնորդություն՝ Ռ.Քոչարյանի նկատմամբ  անձնական երաշխավորություն խափանման միջոցը ընտրելու վերաբերյալ։  Երկրորդ նախագահի համար երաշխավորել են ՀՀ և ԱՀ նախկին վարչապետները՝ Վազգեն Մանուկյանը, Խոսրով Հարությունյանը, Կարեն Կարապետյանը, Անուշավան Դանիելյանը։  Հիշեցնենք, որ սա անձնական երաշխավորության երկրորդ միջնորդությունն է, իսկ  առաջինը քննարկվել է 2019 թվականի մայիսին, երբ երկրորդ նախագահի համար երաշխավորեցին Արցախի ներկայիս եւ նախկին նախագահներ Բակո Սահակյանն ու Արկադի Ղուկասյանը, ինչը դատավոր Դավիթ Գրիգորյանը բավարարեց, սակայն դրանից հետո վարչապետի կոչով արգելափակվեցին դատարանի մուտքերը, իսկ դատավորի նկատմամբ հարուցվեց քրեական գործ, նրա լիազորությունները ժամանակավորապես կասեցվեցին, իսկ գործն էլ մակագրվեց դատավոր Աննա Դանիբեկյանին։

«Փաստինֆո»-ի հարցին, թե երբ են պատրաստվում ներկայացնել նախկին 4 վարչապետների միջնորդությունը, Ալումյանը նկատեց, որ դրա անհրաժեշտությունը չի լինի, եթե դատարանը որոշի դադարեցնել ապօրինի քրեական հետապնդումը, բայց  շարունակելու դեպքում, ապա թերեւս դատական նիստում կքննարկվի մեկ այլ միջնորդություն՝ դատավորին ինքնաբացարկ հայտնելու մասին։ Փաստաբանը նշեց, որ խոսքը գնում է դեռեւս 2020 թվականի հունվարի 9-ին ներկայացված ինքնաբացարկի միջնորդությանը, որը սպասում է իր քննարկմանը։ Ներկայացված ինքնաբացարկի միջնորդության հիմքերը նոր են ի հայտ եկել։

Անդրադառնալով՝ դատարանի անկախության վերաբերյալ հարցին, թե ինչ հիմքեր կան ասելու, որ դատավոր Աննա Դանիբեկյանն ինքնուրույն չէ որոշումները կայացնում՝  Ալումյանն ասաց. «Ընդունենք, որ դատավորին ոչ ոք չի զանգել եւ չի ասել՝ այսպիսի որոշում կայացնել, բայց նա իր աչքի առաջ ունի դատավոր Դավիթ Գրիգորյանի օրինակը, ով ազատ արձակեց պարոն Քոչարյանին և հենց նույն օրվանից սկսեցին հալածել։ Հիշում եք, թե ամբոխն ինչպես էր տրամադրված.դատարանը պաշարել էին, իրար էին փոխանցում Դավիթ Գրիգորյանի հասցեն և հեռախոսահամարը, գրեթե անցենզուր, արտահայտություններ էր կիրառում վարչապետը ՝ այդ դատավորի հասցեին։ Հետո դատարանները փակեցին։ Հետո քրեական գործ հարուցեցին և մեղադրանք առաջադրեցին դատավոր Դավիթ Գրիգորյանի։ Հիմա պատկերացրեք, որ նույնիսկ այն դեպքում, որ Աննա Դանիբեկյանի առաջ որեւէ մեկը պահանջ չի դրել, որ պետք է մերժի պաշտպանական կողմի միջնորդությունները, բայց նա արդեն կարող է չէ կանխատեսել, թե ինչ կարող է իր հետ պատահել, եթե պաշտպանական կողմի միջնորդությունները բավարարվեն»։

Փաստաբանի խոսքով՝ իր կանխավարկածի համաձայն՝ օրենքը պետք է գերակա լինի, բայց կա մի կողմ, որը բացարձակապես աղերս չունի օրենքի հետ։

«Կա ինչ-որ մարդու կամք, որը վերից վար թելադրում է ամբողջ դատական համակարգին»,- նշեց Ալումյանը։

Մանրամասները՝ տեսանյութում։

Աղբյուր` Փաստինֆո