Փաստ ինֆո

Քրեական գործի 82 թերթում որևէ նշում չկա Սերժ Սարգսյանի անձը բնութագրող տվյալների մասին։ Այս մասին ՀՀ երրորդ նախագահ Սերժ Սարգսյանի և մյուսների գործով դատական նիստին հայտարարել է Սերժ Սարգսյանի պաշտպան Ամրամ Մակինյանը՝ խնդրելով պետական իրավասու մարմիններից պահանջել այդ տվյալները և կցել գործի նյութերին։ 

«Դատաքննության հենց սկզբից, երբ պարոն Սարգսյանը ներգրավվել է որպես մեղադրյալ, բազմաթիվ են խախտումները, ես կդժվարանամ նաև հաշվել, թե իմ ներկայացրած քանի միջնորդություն է մերժվել, այդ խախտումները ավարտվեցին մեղադրական եզրակացության կազմամբ, հիմա էլ չի ներկայացվում պարոն Սարգսյանի անձի բնութագիրը։ Ինչու՞ չի նշվել, որ Երրորդ նախագահը արցախյան ինքնապաշտպանական ուժերն է ղեկավարել, որ եղել է ՊՆ նախարար, արդյո՞ք նրա անձը չեն բնութագրում նաև իրադարձությունները, որ տեղի են ունեցել 1989-93թթ., այն, որ 1994թ զինադադարը ստորագրվել է Սերժ Սարգսյանի կողմից»,- ասաց Մակինյանը։

Մակինյանի խոսքով՝ 14 տարի անընդմեջ պատասխանատվություն է կրել ՀՀ սահմանների պաշտպանության համար, իսկ 2008-18թթ նախագահ հանդիսանալով՝ եղել է Գերագույն գլխավոր հրամանատար, ինչի մասին որևէ նշում ևս չկա։

Պաշտպանի հայտարարությանն առարկեց մեղադրող դատախազ Արսեն Մարտիրոսյանը՝ նշելով, որ վարույթն իրականացնող մարմինը նշել է այն հանգամանքները, որոնք իրեն հայտնի են քրեական գործով։ Մարտիրոսյանը նշեց, որ վարույթն իրականացնող մարմինը գտել է, որ դրանք արդեն հայտնի տեղեկություններ են և դրանք քրեական գործում ներառելու անհրաժեշտություն չկա, բայց, եթե ամեն դեպքում պաշտպանները գտնում են, որ դրանք կարևոր են, ապա նրանք զրկված չեն գործում դրանք ներառելուց։ Նախագահող դատավոր Վահե Միսակյանը հայտարարեց, որ միջնորդության քննությանը կանդրադառնա ավելի ուշ։

«Փաստինֆո»-ի հաղորդմամբ՝ այս պահին պաշտպանական կողմը բացարկի միջնորդություն է ներկայացնում դատախազին։
Հիշեցնենք, որ Երևանի ընդհանուր իրավասության դատարանում սկսվել է ՀՀ երրորդ նախագահ Սերժ Սարգսյանի և մյուսների գործով առաջին դատական նիստը։

Ըստ ՀՀ հատուկ քննչական ծառայության տարածած հաղորդագրության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Քրեական գործով ընդհանուր առմամբ 5 մեղադրյալ կա։ Սերժ Սարգսյանից բացի մեղադրանքներ են առաջադրվել նաեւ գյուղատնտեսության նախկին նախարար Սերգո Կարապետյանին, փոխնախարար Սամվել Գալստյանին, վարչության պետ Գեւորգ Հարությունյանին, գործարար Բարսեղ Բեգլարյանին։

Աղբյուր` Փաստինֆո