Փաստ ինֆո

«Սիրելի ընկերներ, սիրելի աջակցիներ, շնորհակալ եմ որ եկել եք ինձ աջակցելու, իսկ մեծ հաշվով եկել եք պաշտպանելու արդարադատությունը»,-քիչ առաջ դատարանի առջեւ իրեն սատարող քաղաքացիներին դիմեց ՀՀ 3-րդ նախագահ Սերժ Սարգսյանը։

«Խնդրում եմ իմ երախտագիտությունը հայտնել ձեր մերձավորներին հարազատներին, ովքեր չեն փորձել այս անբարենպաստ եղանակին մնալ տանը, ինչպես ասում են ՝ շառ ու փորձանքից հեռու։ Շատ-շատ շնորհակալ եմ։ Հաշվի առնելով եղանակային պայմանները եւ այն հանգամանքը, որ հույս կա, որ Հայաստանում դեռ կան դատավորներ, ում համար արդարադատությունը վեր է ամեն ինչից, ուղիղ այնպես, ինչպես ինձ համար ձեզ համար, հայ ժողովրդի մեծամասնության համար ԼՂ-ի անկախությունը վեր է ամեն ինչից, խնդրում եմ վերադառնալ տուն, զբաղվել ձեր առօրյա հոգսերով ՝ չմոռանալով երբեւէ ՀՀ անվտանգության մասին»,-հավաքվածներին դիմեց Սերժ Սարգսյանը

Նա շեշտեց, որ աշխարհի ամենաբարձր ամբիոններից պարբերաբար հայտարարել է ու հիմա էլ կրկնում է՝ Լեռնային Ղարաբաղը երբեք չի լինելու Ադրբեջանի կազմում։ «Սա եղել է իմ կյանքի գերագույն նպատակը , այն ինձ ուղեկցելու է մինչեւ վերջ եւ ամենուր»,-հայտարարեց ՀՀ 3-րդ նախագահը՝ շնորհակալություն ու ցտեսություն մաղթելով հավաքվածներին։

«Մինչեւ նոր հանդիպումներ»,-ասաց նա ու «նախագահ», «նախագահ» վանկարկումների ներքո մտավ դատարան։

Հիշեցնենք, որ Երեւանի դատարանի Նոր Նորքի նստավայրում մեկնարկում է ՀՀ 3-րդ նախագահ Սերժ Սարգսյանի գործով դատավարությունը, իսկ մինչեւ դատական նիստի մեկնարկը դատարանի շենքի առջեւ ընթանում է ի սատարումն 3-րդ նախագահի բողոքի ակցիան։

Աղբյուր` Փաստինֆո