Փաստ ինֆո

Եթե ինձ հարցնեին՝ ինչն առաջին հերթին պետությունը պետք է ապահովի իր քաղաքացիների համար՝ ես կասեի անվտանգությունն ու արդարադատությունը։ Այս մասին այսօր ԱԺ խորհրդարանական լսումների ժամանակ ասաց Հայ Ազգային Կոնգրեսի փոխանախագահ Լևոն Զուրաբյանը։

Նա նշեց, որ այսօր դատավորների մեծամասնությունը կոռումպացված, բազմաթիվ հանցագործություններ գործած, իրենց խղճին դեմ գնացած, ուրիշների տառապանքների հաշվին հարստացած, քաղաքական պատվերներ կատարած մարդիկ են։

«Բնականաբար մենք պետք է հասկանանք ինչպես ենք այս խնդիրը լուծելու։ Դատավորներն անարդար դատական ակտեր են կայացրել 2 պատճառով։ Մեկը՝ դա եղել է իշխանությունների պատվերը, քաղաքական հետապնդման պատվերը, իսկ մյուսը շահադիտական ուղղությունը։ Այսինքն` մարդիկ օգտագործել են իրենց պաշտոնը, օգտագործել են նաև այն, որ իրենց քաղաքական պատվերներով դիմել են և իրենց իրավունքներ են վերապահել, իմացել են, որ վերևներից հովանավորելու են»,-ասաց Զուրաբյանը։

Նա նշեց, որ նման դատավորներին «մաքրելու» համար կա երկու մեխանիզմ՝ կամ պետք է քրեական կամ էլ կարգապահական պատասխանատվության ենթարկել։

«Որոշ հանցագործությունների դեպքում, օրինակ մարտի 1-ի կապակցությամբ կայացած անարդար վճիռների դեպքում, քրեական մեխանիզմն այլևս գործել չի կարող, որովհետև վաղեմության խնդիր կա»,-ասաց Զուրաբյանը։

Նրա խոսքով, ինչպես իսլամական պետության տեռորիստներն իրենց հետևից ականներ, ծուղակներ են թողնում, այնպես էլ այն ավազակախումբը, որ տիրում էր Հայաստանն ու գնացել է հեղափոխության շնորհիվ, իրենից հետո թողել է կոռումպացված դատավորներ ՍԴ-ում և մյուս ատյանների դատարաններում։

«Դուք էլ՝ այսօրվա իշխող մեծամասնությունը, ըստ էության, փակում եք նաև կարգապահական պատասխանատվության դուռը։ Ձեր առաջարկված 144-րդ հոդվածում ասված է, որ դատավարական իրավունքի նորմի դիտավորությամբ կամ կոպիտ անփութության խախտման հիմքով կարգապահական խախտման վարույթ չի կարող հարուցվել, եթե եզրափակիչ դատական ակտն օրինական ուժի մեջ մտնելուց հետո անցել է 8 տարի։ Սա նշանակում է, որ կարգապահական պատասխանատվության կարող են կանչվել 2012թ-ից սկսած օրինախախտումների համար»,-ասաց Զուրաբյանը։

Աղբյուր` Փաստինֆո