Փաստ ինֆո

ՀՀ երկրորդ նախագահ Ռոբերտ Քոչարյանի որդիները` Լևոն ու Սեդրակ Քոչարյանները, հրավիրել են ՀՔԾ հարցաքննության, սակայն նրանք հրաժարվել են ցուցմունք տալ։ Այսօր այս մասին հայտնել է Լևոն Քոչարյանը՝ նշելով, որ իրենք հարցաքննության են հրավիրվել «5-րդ ալիք» հեռուստաընկերության սեփականատեր Արմեն Թավադյանի գործով։

«Մեզ որպես վկա էին կանչել Արմեն Թավադյանի գործով` այն ենթադրյալ աջակցի գործով։ Մենք` ես ու եղբայրս, ցուցմունք չենք տվել, որովհետև բազմիցս հայտնել ենք այդ կառույցի հանդեպ մեր վերաբերմունքը. պետից սկսած` մի քանի անգամ անմեղության կանխավարկած են խախտել»,– ասաց նա։
Լևոն Քոչարյանը հայտնել է, որ ՀՔԾ–ում մնացել են 20 րոպե։

«Որովհետև ցուցմունք տալուց հրաժարվելու դեպքում ինչ–որ ձևակերպումներ պիտի անես»,– ավելացրեց նա։

Հիշեցնենք` Արմեն Թավադյանը մեղադրվում է մարտի 1-ի դեպքերից տուժած անձանց կաշառելու փորձի համար: Նա ձերբակալվել է 2019 թվականի դեկտեմբերին, այնուհետև կալանավորվել։ Ըստ ՀՔԾ-ի` Թավադյանը ձերբակալվել է Ռոբերտ Քոչարյանի ենթադրյալ աջակից Վարուժան Մկրտչյանին առնչվող քրեական գործի շրջանակներում, ՀՀ քրեական օրենսգրքի 340-րդ հոդվածի 4-րդ մասի 1-ին կետով նախատեսված հանցավոր արարք կատարելու կասկածանքով:

Աղբյուր` Փաստինֆո