Փաստ ինֆո

Մեր քաղաքական իշխանության գործընկերը անցած տարի հայտարարություն էր տարածում, որ ողջ դատական իշխանությունը կոռումպացված է և կարելի է մեկ-երկու լավ դատավոր գտնել, իսկ մյուսները վատն են ու թաթախված են հանցավորության մեջ։ Այս մասին այսօր ԱԺ ամբիոնից ասաց «Լուսավոր Հայաստան» խմբակցության պատգամավոր Տարոն Սիմոնյանը։

Նա նշեց, որ այսօր քաղաքական իշխանության ներկայացուցիչներն ասում են, որ դատական իշխանությունը մեծամասնությամբ լավն է և որոշներն են պղտորում ջուրը։

«Այստեղից երկու հետևություն կարելի է անել։ Կամ մեր քաղաքական գործընկերները նախկինում անպատասխանատու հայտարարություններ էին անում և սևացնում բարեխիղճ դատավորներին, կամ մեր քաղաքական իշխանության գործընկերներն արդեն ունեն հավատարմության երդում դատական իշխանության դատավորների մեծամասնությունից»,-ասաց Սիմոնյանն ու ավելացրեց, որ երկու դեպքն էլ անընդունելի է և անպատասխանատու վերաբերմունք է պետականության նկատմամբ։

ԼՀԿ խմբակցության պատգամավորն ասաց, որ երբ մեկ տարի առաջ խոսվում էր վեթինգի մասին, իրենք որոշակի սկզբունքներ էին մշակել, քանի որ կարծում են՝ դատական իշխանությունն արմատական փոփոխությունների կարիք ունի։

«Այսօր քաղաքական իշխանությունը որոշել է, որ կոսմետիկ փոփոխությունների միջոցով բարեվարքության որոշ կանոններ փոփոխելու միջոցով կարող ենք նպատակին հասնել։ Եթե այս ճանապարհն ենք ընտրում, խնդիր չկա, մենք կրկին մեր դիտարկումներն ու դիտողությունները կասենք, բայց այն նախագիծը, որը ներկայացել է, ոչ թե նպաստում է նրան, որ մենք ունենանք անկախ դատավոր, այլ նրան, որ ունենանք վախեցած դատավոր, կաշկանդված դատավոր»,-շեշտեց Սիմոնյանը, անդրադառնալով դատավորին կարգապահական պատասխանատվության ենթարկելուն։

Աղբյուր` Փաստինֆո