Փաստ ինֆո

«Չեմ կարող ասել, թե գործի որ մասն է շինծու, որ մասը՝ ոչ, բայց այն մասը, որ Սերժ Սարգսյանին ներգրավել են այս գործի մեջ, ես գտնում եմ, որ այո, քաղաքական ենթատեքստ ունի։ Ես շատ լավ ճանաչում եմ Սարգսյանին եւ գիտեմ, որ նա չի կարող միջամտել եւ տալ ինչ-որ ցուցում, որ այս կամ այն ընկերությունը շահի»,-լրագրողների հետ ճեպազրույցում ասաց ի պաշտպանություն ՀՀ 3-րդ նախագահ Սերժ Սարգսյանի բողոքի ակցիայի մասնակցող ՀՀ ԱԺ նախկին փոխնախագահ Արա Բաբլոյանը։

«Դուք նոր ասացիք, որ ՀՔԾ-ն ասում է, ես էլ ձեզ կարող եմ ասել, որ ՀՔԾ-ն ասում է, որ Արա Բաբլոյանը հանցագործություն է թույլ տվել Հրայր Թովմասյանի ընտրության հարցում»,-նշեց Բաբլոյանը՝ արձագանքելով լրագրողի դիտարկմանը, որը հիշեցնում էր Սերժ Սարգսյանին առաջադրված մեղադրանքը։

Նա ասաց, դատավարությունից հետո գործի 5 հատորներին կծանոթացնի լրագրողներին եւ նրանք կտեսնեն, որ որեւէ բառ չկա, որի հիման վրա հնարավոր կլինի ասել, թե Բաբլոյանը սխալ է արել. «Ես չգիտեմ , թե ՀՔԾ-ն ինչի վրա է հիմնվել»
Արա Բաբլոյանը ասաց, թերահավատ է արդարադատության իրականացման հարցում, նա նկատեց, որ գործ է հարուցվում մի նպատակով, որ ամեն գնով ազատվեն Հրայր Թովմասյանից եւ մեղադրում են ցանկացած մարդու՝ առանց որեւէ հիմքի։

«Երբ դատարանը որոշում կընդունի իմ հարցով, մենք բոլորս կիմանանք՝ ինչ մակարդակում է գտնվում արդարադատությունը»,-հայտարարեց Արա Բաբլոյանը՝ մանրամասներ ներկայացնելով իր դեմ հարուցված քրեական գործից։

Նա նաեւ շեշտեց, որ երկրի վարչապետը իրեն թույլ է տալիս Հանրային հեռուստաընկերության եթերում 3 անգամ նշել, որ Արա Բաբլոյանը , լինելով ԱԺ նախագահ, իրեն թույլ է տվել ապօրինություն։

Բաբլոյանը նաեւ նշեց, որ տվյալ քվեարկությանը մասնակցած բոլոր պատգամավորները հավասար պատասխանատվություն ունեն, որքան ինքը, որը նրանցից յուրաքանչյուրին հավասար պատգամավոր է եղել։

Հիշեցնենք, որ Երեւանի դատարանի Նոր Նորքի նստավայրում 15։00-ին կմեկնարկի ՀՀ 3-րդ նախագահ Սերժ Սարգսյանի գործով դատավարությունը, իսկ մինչեւ դատական նիստի մեկնարկը դատարանի շենքի առջեւ ընթանում է ի սատարումն 3-րդ նախագահի բողոքի ակցիան։

Մանրամասները՝ տեսանյութում։

Աղբյուր` Փաստինֆո