Փաստ ինֆո

Ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով դատական նիստին շարունակվում է 2018թ. ապրիլին բողոքի լայնածավալ ակցիաների ժամանակ ոստիկանների և ակցիայի մասնակիցների միջև բախումների տեսաձայնագրությունների հետազոտությունը։

Տեսանյութերում երևում է, թե ինչպես են ոստիկանական ուժերը բախումների ժամանակ օգտագործում լուսաձայնային նռնակներ։ Ընդ որում՝ տեսնայութերում առկա են նաև տուժողների մասին դրվագներ։ Տեսաձայնագրություններից մեկում երևում էր, թե ինչպես է ակցիային մասնակցող կանանցից մեկը դեմքի շրջանում վիրավորում ստանում, ընդ որում՝ աղջկա դեմքն ամբողջությամբ արնաշաղախ էր։ 

Պաշտպան Տիգրան Սաֆարյանը պնդեց, որ տվյալ տեսանյութից չի կարելի պատկերացում կազմել ցույցի խաղաղ լինելու մասին, որովհետև տեսանյութում ոստիկանական փշալարարերն արդեն բացված են։ Ինչ վերաբերում է տուժած աղջկան, ապա պաշտպանն ասաց, որ նա Լևոն Երանոսյանի գործով որպես տուժող ներգրավված չէ և Լևոն Երանոսյանի մեղադրանքի ծավալում ներառված չէ աղջկա վիրավորում ստանալու դրվագը, մինչդեռ՝ տուժողի ներկայացուցիչ Արա Ղարագյոզյանը վստահեցրեց՝ սույն գործով աղջիկը տուժող է ճանաչված։ ԱԺ փոխխոսնակ Ալեն Սիմոնյանը, ով ևս այս գործով տուժող է ճանաչված, նշեց, որ ոստիկանության նկատմամբ ուժ կիրառելը պարտության ճանապարհ է։

Ինչ վերաբերում է ոստիկանների և ցուցարարների քանակին, ապա կազմակերպված զորքն ավելի մարտունակ է և ճիշտ է գործում, քան՝ մարդիկ, ովքեր դուրս են եկել խաղաղ ակցիա իրականացնելու։

Պաշտպան Սաֆարյանը, հակադարձելով Սիմոնյանին, նշեց, որ առանձին անձինք բռնություն են կիրառում և դա չտեսնելու տալ չի կարելի։

«Փաստինֆո»-ն ավելի վաղ տեղեկացրել է, որ Լևոն Երանոսյանը մեղադրվում է պաշտոնեական լիազորություններն անցնելու մեջ: Ըստ մեղադրանքի` 2018 թվականի ապրիլի 16-ին և 22-ին ՝Երևան քաղաքում անցկացված բողոքի զանգվածային ակցիաների ժամանակ, ցուցարարների նկատմամբ գործադրել է ընդհանուր առմամբ 8 հատ «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում` ծանր և միջին ծանրության վնաս:

Լևոն Երանոսյանի կողմից հատուկ միջոցների գործադրման հետևանքով Բաղրամյան պողոտայում ծառայություն իրականացնող ՀՀ ոստիկանության զորքերի զինծառայողներից 6 հոգի նույնպես ստացել են մարմնական վնասվածքներ:

Նշենք նաև, որ գործով տուժողներից են նաև ՀՀ վարչապետ Նիկոլ Փաշինյանը և ԱԺ փոխխոսնակ Ալեն Սիմոնյանը։
ՀՀ ոստիկանության ներքին զորքերի նախկին հրամանատարի նկատմամբ խափանման միջոց է ընտրվել ստորագրությունը երկրից չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո