Փաստ ինֆո

ԱԺ աշխատակազմի ղեկավարի նախկին տեղակալ Արսեն Բաբայանին նոր մեղադրանք է առաջադրվել ՝ պաշտոնեական դիրքը չարաշահելու եւ պաշտոնեական կեղծիք կատարելու համար։

«Փաստինֆո»-ի հետ զրույցում այս մասին ասաց Արսեն Բաբայանի փաստաբան Երվանդ Վարոսյանը։

«Ըստ էության, մեղադրանքը բովանդակային առումով գրեթե նույնն է, փոխվել է միայն այն, որ պարզվել է, որ Արսեն Բաբայանը չի օժանդակել ՍԴ-ի լիազորությունների յուրացմանը։ Մնացած առումով նույն այն պատմությունն է, որը մենք արդեն մի քանի ամիս է լսում ենք՝ այդ թվում եւ վարչապետի շուրթերից, թե ինչ-որ հատուկ դիտավորությամբ եղել է հրաժարական, որից հետո հրաժարականի դիմումը հետին ամսաթվով է մուտքագրվել, որպեսզի ԱԺ կանոնակարգ օրենքի նոր խմբագրության ուժով Հրայր Թովմասյանին ՍԴ նախագահ նշանակի ԱԺ-ն։ Սա է էությունը»,-ասաց փաստաբանը՝ հավելելով, թե չգիտի, թե ինչպես է նման մեղադրանք առաջադրվել իր վստահորդին եւ առհասարակ, ինչ կյանք կարող է ունենալ այդ մեղադրանքը։

Հիշեցնենք, որ դատախազությունը 2 անգամ չէր հաստատել ԱԺ նախկին նախագահ Ա. Բաբլոյանին և աշխատակազմի ղեկավարի նախկին տեղակալ Ա. Բաբայանին առաջադրված մեղադրանքները, ապա մերժել էր դրանք փոփոխելու դատախազի ցուցումի դեմ ՀՔԾ քննիչի ներկայացրած առարկությունը։

«Արա Բաբլոյանին և Արսեն Բաբայանին վերաբերող քրեական գործով հսկողություն իրականացնող դատախազի՝ մեղադրական եզրակացությունը չհաստատելու և քրեական գործը վերադարձնելու որոշման վերաբերյալ նախաքննական մարմնի ներկայացրած առարկությունը մերժվել է անհիմն լինելու պատճառաբանությամբ»,- ավելի վաղ «Փաստինֆո»-ին ասել էին գլխավոր դատախազությունից։ Դատախազությունը նշել էր, որ արարքը սխալ է որակվել ՀՔԾ-ի կողմից։

Հիշեցնենք, որ Արա Բաբլոյանին մեղադրանք էր առաջադրվել ՀՀ քրեական օրենսգրքի 300-րդ հոդվածի 1-ին մասով /իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության

Նախագահի, Ազգային ժողովի, կառավարության կամ սահմանադրական դատարանի լիազորություններին տիրանալը/ և 314-րդ հոդվածի 1-ին մասով, իսկ Արսեն Բաբայանին՝ ՀՀ քրեական օրենսգրքի 38-300-րդ հոդվածի 1-ին մասով / սահմանադրական դատարանի լիազորություններին տիրանալուն օժանդակելը/ և 314-րդ հոդվածի 1-ին մասով։

Անդրադառնալով մեղադրանքի փոփոխությանը, Երվանդ Վարոսյանն ասաց, որ իր կարծիքով նախաքննական մարմինը քննել ու պարզ է, որ իրականում որեւէ նման բան չկա. Մասնավորապես, այդ գործընթացում ներգրավված բոլոր անձինք հաստատել են, որ իրենք, այո գործել են ԱԺ կանոնակարգ օրենքի նոր խմբագրությամբ եւ դրանով էլ , բնականաբար պետք է գործեին եւ որեւէ մեկի մտքով չի անցել, որ ինչ-որ տարբերություն կա, որ պետք է ենթադրվեր ինչ-որ նման դիտավորություն»,-ասաց Վարոսյանը։

Փաստաբանը տեղեկացրեց, որ Արսեն Բաբայանը մեղադրանքը չի ընդունել եւ հայտարարել , էր որ դա ակնհայտ քաղաքական հետապնդում է իր նկատմամբ, ինչը հաստատվել է նաեւ վարչապետի կողմից այդ մեղադրանքի բովանդակությունը՝ որպես հաստատված փաստ, մի քանի անգամ հնչեցնելով։

Ինչ վերաբերում է այն հանգամանքին, որ նախկինում առաջադրված մեղադրանքը՝ ՍԴ լիազորություններին տիրանալուն օժանդակելու մասով, փաստորեն դատախազությունը 2 անգամ չհաստատեց, Վարոսյանն ասաց. «Իրավական գնահատական տալ մի գործընթացի, որն ի սկզբանե իրավունքի հետ ոչ մի առնչություն չունի, անիմաստ գործ է։ Ի՞նչ են պլանավորել, ի՞նչ են մտածել, չեմ կարող ասել, բայց մի բան ակնհայտ է, որ դավադրության մասին այդ հորինված տեսությունը իրականության հետ ոչ մի կապ չունի, բայց ակնհայտ է նաեւ, որ այն վերջին ամիսներին ՍԴ-ի շուրջ ընթացող գործընթացի մի օղակն է»։

Աղբյուր` Փաստինֆո