Փաստ ինֆո

Իշխանությունների հետ հանդիպման ժամանակ քննարկվող հարցերից մեկը եղել է Արցախի հարցը: Այս մասին այսօր լրագրողների հետ ճեպազրույցում նշեց Հայ Դատի կենտրոնական խորհրդի նախագահ, ՀՅԴ Բյուրոյի ներկայացուցիչ Հակոբ Տեր-Խաչատուրյանը:

«Հանդիպման ժամանակ խոշոր բաժինը վերաբերում էր Արցախյան բանակցություններին, սակայն դա միակը չէր։ Մեր սպասվելիք աշխատանքների մասին տեղեկատվություն փոխանակում նույնպես եղել է, օրինակ ինչպես ենք տանում ինքնորոշման իրավունքի շեշտավորումը բոլոր երկրներում, որտեղ ենք թիրախավորում, որ ուղղակի Արցախի անկախության ճանաչման աշխատանք տանենք, նաեւ ինչպես կարելի է օժանդակել Արցախին տնտեսապես, ֆինանսական միջոցներով: Մենք Արցախից երիտասարդներ ենք ստանում, որոնք աշխատում են մեր գրասենյակներում և հանձնախմբերում, որպեսզի ծանոթանան այդ աշխատանքների ծավալին և ձևին»,-ասաց նա:

Տեր-Խաչատուրյանն ընդգծեց, որ 2020 թվականը կարեւոր տարի է, որովհետեւ Սեւրի դաշնագրի 100-ամյակն է։

Անդրադառնալով Փաշինյան-Ալիև հանդիպմանը, Հայ Դատի կենտրոնական խորհրդի նախագահն ասաց. «Բնականաբար այնտեղ հնչեցին մի քանի հասկացողություններ, որոնց մանրամասների դեպքում մենք անհամաձայնություններ ունենք, բայց երբ համաշխարհային ֆորումում ես բանակցում ու որևէ լուծման պետք է հանգես, այդ լուծումը պետք է ընդունելի լինի բոլոր համար, եթե ընդունելի չլինի, ապա դա լուծում չէ»։

Հարցին, թե արդյոք Հայ Դատը գոհ է ՀՀ կառավարության՝ Արցախի շուրջ տարվող քաղաքականությունից, թե՞ տարաձայնություններ կան, Տեր-Խաչատուրյանը նշեց, որ բնական է՝ կան տարբեր մոտեցումներ.«Մանրամասնությունների մեջ տարբեր մոտեցումներ կան, բայց չեմ կարող ասել, թե դրանք տարաձայնություններ են։ Մեր կեցվածքը բավական արմատական է, բայց նաև հասկանում ենք, որպեսզի բանակցությունները տեղի ունենան, անհրաժեշտ է, որ Հայաստանի կառավարությունը տարբեր այլընտրանքների մասին բանակցի, դա չի նշանակում, որ այդ այլընտրանքներն ընդունելի են, բայց կնշանակի, որ այդ բանակցությունները պետք է ընթանան Մինսկի խմբի համանախագահների հսկողության ներքո »։

Մանրամասները՝ տեսանյութում։

Աղբյուր` Փաստինֆո