Փաստ ինֆո

Կենտրոնական բանկը շարունակում է ակտիվորեն տարադրամ գնել։ Այդ մասին պարբերաբար հայտարարում է նաև Նիկոլ Փաշինյանը։ 

-Այս տարի գնված դոլարի ծավալը դարձավ 47,8 միլիոն դոլար,- օրերս իր ֆեյսբուքյան էջում գրել էր Նիկոլ Փաշինյանը։

Չնայած դրան, տարվա սկզբին Կենտրոնական բանկի պահուստները կրկին նվազել են։ Ընդ որում, ոչ պակաս ակտիվությամբ։

Պաշտոնական տվյալներով, որոնք հրապարակել է Կենտրոնական բանկը, հունվարին Հայաստանի արտաքին տարադրամային պահուստները կազմել են 2 մլրդ 671 մլն դոլար։ Մեկ ամսվա ընթացքում դրանք նվազել են 169 մլն դոլարով։

Անցած տարվա դեկտեմբերին ԿԲ պահուստները հասել էին շուրջ 2 մլրդ 840 մլն դոլարի, որն իսկապես աննախադեպ էր։ Մինչև հիմա պահուստների նման մակարդակ Հայաստանը երբևէ չէր ունեցել։ Ու դա պայմանավորվել էր առաջին հերթին ներքին ֆինանսական շուկայում ձևավորված տարադրամի բարձր առաջարկով, որը դատելով ԿԲ գործողություններից՝ շարունակում է պահպանվել նաև այս տարի։

Ազգային արժույթի վրա ճնշումը թուլացնելու նպատակով դեռ անցած տարվա սկզբից Կենտրոնական բանկը բավական ակտիվ արտարժույթ է դուրս քաշում շուկայից, այլապես դրամի արժևորման տեմպը շատ ավելին կլիներ, քան ունեցանք անցած տարի և ունենք այսօր։ Ամերիկյան արժույթի գինը այժմ տատանվում է 479 դրամի շրջակայքում։

Ներքին շուկայում անցած տարի ձեռք բերված բավական մեծ քանակությամբ տարադրամը հնարավորություն տվեց համալրել արտաքին պահուստները։ 2019թ. ընթացքում դրանք ավելացան 581 մլն դոլար։

Սակայն այս տարվա սկզբին պահուստները դարձյալ նվազել են։ Այդպիսի երևույթ արձանագրվեց նաև անցած տարվա սկզբին։ Հունվարին ԿԲ արտաքին պահուստները կտրուկ նվազեցին։ Այն ժամանակ դրանք կրճատվեցին 265 մլն դոլարով։ Այս տարվա հունվարին կրճատումն ավելի քիչ է, բայց 169 միլիոնն էլ փոքր գումար չէ։ Հատկապես որ, դա տեղի է ունեցել տարադրամային միջոցների ակտիվ գնման պայմաններում։

Այսինքն՝ եթե այդպես չլիներ, ապա պահուստների կրճատումն էլ ավելի մեծ չափերի կհասներ։

Թե ո՞րն է եղել տարեսկզբին պահուստների կրճատման պատճառը, հայտնի չէ։ Բայց դա սովորաբար կապված է լինում երկրի տարադրամային պարտավորությունների սպասարկման հետ։ Այլ հարց, թե տարեսկզբին հատկապես ինչ պարտավորություններ են սպասարկվել։

Որ Կենտրոնական բանկի արտաքին տարադրամային պահուստները կարող են անընդհատ փոխվել, արտառոց երևույթ չէ։ Հաճախ է այդպես լինում։ Դրանք ավելանում կամ պակասում են՝ կապված այն բանի հետ, թե տվյալ ժամանակահատվածում, որ գործոնների ազդեցությունն է ավելի մեծ։

Այս պահին, Կենտրոնական բանկի տարադրամային պահուստները շարունակում են գտնվել բավական բարձր դիրքում։ Դրանք նախորդ տարվա հունվարի համեմատ ավել են 677 մլն դոլարով։

Թե ինչպիսի՞ն կլինեն առաջիկա տեղաշարժերը՝ շատ բանով կախված է ներքին արժութային շուկայի տարադրամային հոսքերից։ Ներկայումս դրանք բավական ակտիվ են, ինչը թույլ է տալիս Կենտրոնական բանկին շարունակել տարադրամային միջոցների ներքաշումը։ Սակայն վաղ է ասել, թե հետագա ամիսներին ինչպես իրեն կդրսևորի շուկան։

Տարադրամային հոսքերը բազմագործոն են և կապված են ինչպես ներքին տնտեսական զարգացումների, այնպես էլ արտաքին հատվածից թելադրված դրսևորումների հետ։ Նայած դրանք ինչպես կարտահայտվեն։

Աղբյուր` Փաստինֆո