Փաստ ինֆո

Ֆինանսական խնդիր միշտ ունենք։ Անցյալում էլ, երբ մարդիկ խոստանում էին, միշտ չէ, որ բոլոր խոստացված գումարները կարողանում էինք հավաքել։ Եթե շատ գումար լիներ, ավելի շատ աշխատանք կկարողանայինք անել։ Այս մասին այսօր լրագրողների հետ ճեպազրույցում ասաց ՀՅԴ Բյուրոյի Հայ դատի եւ քաղաքական հարցերի գրասենյակի պատասխանատու Կիրո Մանոյանը։

Հարցին, կա՞ խնդիր, որ Հայաստանից Հայ դատի ֆինանսավորումը կրճատվել է, Մանոյանը պատասխանեց. «Վերջին հանգանակության ցուցակը դեռ չենք հրապարակել, բայց որ հրապարակենք, կտեսնեք՝ օրինակ, 2016 թվականի դեկտեմբերին Փարիզում կայացած հանգականությանը Հայաստանից, գոնե խոստումներով, մասնակիցների թիվը եւ Բրյուսելում անցած տարվա նոյեմբերին Հայաստանից խոստում տվածների թիվը բավական պակաս է»։

Նա նշեց, որ կոնկրետ ինչ-որ բանով չի կարող պայմանավորել ֆինանսավորման կրճատումը։ Մանոյանը չբացառեց, որ հնարավոր է իրենց աշխատանքից են մարդիկ դժգոհ, նաև հնարավոր համարեց, որ քաղաքացիների վիճակը լավ չէ կամ քաղաքական ճնշում կա. «Չի բացառվում, որ քաղաքական ճնշումներ կան։ Հիմք չկա բացառելու համար»։

Անդրադառնալով ԱԳՆ-ի հետ ունեցած հանդիպմանը, Մանոյանն ասաց , որ միայն Արցախի հարցի հետ կապված չի եղել քննարկումները. «Հանդիպումն ավելի քան 5 ժամ է տվել։ Պետության հետ միշտ էլ եղել են տարաձայնություններ։ Մենք այս գործընթացը սկսել ենք 1997 թվականին՝ Լեւոն Տեր-Պետրոսյանի նախագահության օրոք, երբ Ալիկ Արզումանյանն էլ արտգործնախարար էր, եւ դա իր ճիշտ, խելամիտ առաջարկն էր։ Եվ այդ տարվանից սկսած, պարբերաբար

Արտգործ նախարարության հետ եղել են հանդիպումներ, փոխադարձ տեղեկություններ փոխանցվել է։ Այնպես որ զարմանալի բան չկա, որ կարող է քաղաքական կազմակերպությունը, Հայ Դատի կառույցները՝ որպես հասարակական կազմակերպություն, որոնք այլ պետություններում են գործում, այլ հնարավորություններով, կարող են տարակարծություններ ունենալ։ Բայց դրանց մասին մենք խոսում ենք։ Մեզ համար արտաքին քաղաքականությունը նույն սահմանի շարունակությունն է, եւ ինչպես պաշտպանության գործում սակարկություն չկա նաեւ արտաքին քաղաքականության մեջ անկախ մեր ներքին տարակարծություններից, այստեղ նույնպես սակարկություն չկա»։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո