Փաստ ինֆո

Սահմանադրական հանրաքվեն շոուի վերածած իշխանությունը իր բաղձանքի իրականացումից, այսինքն, հանրաքվեի ընթացքում 650 հազար ձայն ապահովելուց հետո, ինչն օրինականության շրջանակում, մեղմ ասած, անհնարին է, պատրաստվում է իր միադեմ քպական ֆրակցիայի միջոցով օրինականացնել իրենց նախաձեռնած մի շարք օրենսդրական նախագծեր, որոնք հերթի են դրված ԱԺ մեծամասնության կողմից արդեն տևական ժամանակ:

Այդ համատեքստում է նաև Հայաստանում մարիխուանայի օրինականացումը:

Շատերն են հիշում, թե ինչպես դեռևս անցյալ տարի ապրիլին ԱԺ «Իմ քայլը» իշխանական խմբակցության պատգամավոր Նիկոլայ Բաղդասարյանի հայտարարությանը հաջորդեց հանրային վայրում մարիխուանայի միջազգային օր նշելու մի տարօրինակ արարողություն, որի նպատակը մարիխուանայի օրինականացումը, այսինքն՝ ապաքրեականացումն էր: Ընդ որում, ուշագրավ է, որ այդ քարոզչությունը իրականացնողը տվյալ պատգամավորի հարազատ եղբայրն էր:

Փաստորեն, մի եղբայրը մարիխուանայի օրինականացման փողոցային քարոզչությունն է ստանձնել, մյուսը՝ իրավաբան եղբայրը Ազգային Ժողովում այն ընթացք տվող պատգամավորը:

Այսպես, քայլ առ քայլ, տերև առ տերև են սկսել իրենց քարոզչությունը հայ մարիխուանասերները, որոնք հիմնականում ներկա իշխանության ներկայացուցիչներն են: Եվ բնականաբար, նրանք սկսել են նախ՝ վիրտուալ տարածքում՝ սոցցանցային հարթակներում խմբեր ստեղծելուց, համակիրներ հավաքելուց, տարբեր լրատվամիջոցներով մարիխուանայի գովքն անելուց:

Նկատենք, որ ԱԺ փոխխոսնակ Ալեն Սիմոնյանի՝ դեռևս 2017 թվականին ստեղծած մարիխուանա քարոզող՝ «Օրինական Հայաստանում» անունը կրող ֆեյսբուքյան խումբն առայսօր գոյություն ունի, որի ադմիններից մեկն այսօր էլ շարունակում է ինքը լինել :

Այնպես որ, այս խմբի քարոզած մարիխուանայով պիցցաները եթե մի գեղեցիկ օր Հայաստանի ռեստորաններում և սրճարաններում մատուցվեն, բնավ չզարմանաք: Բնականաբար, այդ ամենը կհամեմվի զբոսաշրջության զարգացման լեգենդով, մարիխուանայի առողջարար հատկանիշներով, որոնց մասին ԱԺ փոխխոսնակի հիմնած խմբում հաճախ կարելի է հանդիպել:

Մարիխուանա քարոզող խմբի անդամների մեջ ՔՊ-ական շրջանակներից բավականին մարդիկ կան, այդ թվում, նաև՝ փոխվարչապետ Տիգրան Ավինյանը, ՏԿ նախարար Սուրեն Պապիկյանը, ԿԳ նախարար Արայիկ Հարությունյանը, ԱԺ արտաքին հարաբերությունների հանձնաժողովի նախագահ Ռուբեն Ռուբենյանը, ԱԺ պատգամավոր՝ Հրաչյա Հարությունյանը, պետական կառավարման համակարգի ներկայացուցիչներ, ավագանու անդամներ…

Իհարկե, այստեղ կան նաև մարդիկ, որ պատահականորեն կամ չիմացության հետևանքով են հայտնվել, ասենք՝ մեխանիկորեն իրենց ֆբ ընկերներին տեսնելով անդամագրվել են, բայց շատերն էլ հասկանալով, թե ինչ խմբի մեջ են ներգրավվել, լքել են խումբը՝ իրենց ընկերներին էլ կոչ անելով լքել գրուպը, զգուշացնելով, որ սրա հաջորդ քայլը միասեռականների ամուսնությունը օրինականացնելն է:

Այն, որ մարիխուանան թմրամիջոց է, որն օգտագործողի մոտ այն աստիճանաբար կարող է կախվածության առաջացնել, իսկ ցանկացած կախվածություն՝ հիվանդություն է, կհաստատի ցանկացած բժիշկ: Ի հավելումն, հոգեբաններն ուղղակի կապ են տեսնում մարիխուանայի օրինականացման և աշխարհում ահագնացող բռնությունների և սպանությունների միջև, զգուշացնելով, որ դրա ազդեցությամբ բռնարարքների հավանականությունը առավել մեծ է: Այսինքն, սա ազգը խեղելուն ուղղված քայլ է:

Այս համատեքստում իշխանությունների տոտալ պայքարը ծխախոտի դեմ, ծխախոտը թանկացնելուն ուղղված քայլերը ծիծաղելի են թվում. եթե ազգի, առողջ սերունդ ունենալու մասին մտահոգ լիներ իշխանությունը՝ մարիխուանայի օրինականացման հարց չէր դնի: Երկրներ կան, որ ընդհանրապես մարիխուանայի վաճառքի և օգտագործման համար երկարատև ազատազրկում և նույնիսկ մահապատիժ են նախատեսում:

Հեղինակ՝ Մարինե Մինասյան

Աղբյուր` Փաստինֆո