Փաստ ինֆո

Հանրաքվեի ընդդիմադիրներին սեւացնելը դժվար է լինելու։ «Փաստինֆո»-ի եթերում ասել է քաղտեխնոլոգ Արմեն Բադալյանն՝ արձանագրելով, որ «Ոչ»-ի շտաբը ձեւավորել են իրավաբանները, որոնց մեջ է նաեւ Փաշինյանի նախկին փաստաբանը։

Նրա գնահատմամբ՝  եթե «ոչ»-ի ճամբարը ներկայացնեին նախկին իշխանության ներկայացուցիչները կամ խորհրդարանական ընդդիմությունը, ապա քաղաքական «այո»-ի կողմից հնարավոր կլիներ «ոչ»-ը նույնականացնել նախկին «կոռումպացված» համակարգի հետ, սև ու սպիտակի բաժանել, սակայն ընդդիմությունը չստեղծեց շտաբ,«ոչ»-ը ձևավորել են իրավաբանները, փաստաբանները, հետեւապես իշխանությունների համար շատ դժվար է նրանց սևացնելը։

«Հիմա գործունեության մեջ են մտնում մանիպուլյացիոն տեխնոլոգիաները։ Երբ վերցնում են լուսանկար, գրում են՝ «ոչ»-ը քանդված ճանապարհներն են, «այո»-ն կառուցված ճանապարհներն են, բնականաբար դա նույնպես ուղղված է պողոսներին»,- ասել է Բադալյանը  ու նկատել, որ այդ քանդված ճանապարհների կողքին  կա նաև Հյուսիսային պողոտան, ուր Փաշինյանն ուղեկցել էր Մերկելին ու զբոսնում էր այնտեղ։  Այն նույնպես  «ոչ»-ի ժամանակ է կառուցվել։

Ա.Բադալյանի խոսքով, իշխանությունները չեն կարող անկեղծ ասել,  որ հանրաքվեի ամբողջ նպատակը 7 դատավորներին աշխատանքից ազատելն է, քանի որ այդ դեպքում շատերը չեն գնա քվեարկության։

«Պողոսները կան, բայց հնարավոր է այլևս 650 հազար պողոս չլինի։ Նրանց թիվը շատ է փոքրացել, դրա համար իրականությունը պետք է փոխարինել վիրտուալ իրականությամբ, իսկ վիրտուալ իրականությամբ փոխարինելու համար պետք է մանիպուլյացիոն տեխնոլոգիաներ կիրառել»,-ասել է քաղտեխնոլոգը։

Որպես մանիպուլյատիվ հնարք է դիտարկվել նաեւ բուն հանրաքվեի անցկացումը, որովհետեկ ամիսներ առաջ իշխանական պատգամավորը կարծում էր, որ իր հարեւան անգրագետ  Պողոսը չի կարող  որոշել  Ամուլսարի հանքը ենթակա է  շահագործման, թե ոչ, բայց Սահմանադրական դատարանին վերաբերող հարցը, որի հետ երբեւէ չի առնչվել, կարող է հանրաքվեով որոշել, որ այս հոդվածը չի համապատասխանում Սահմանադրության։ «Հետաքրքիր է, թե քանի տոկոսն է ամբողջությամբ» կարդացել Սահմանադրությունը»,- նշել է բանախոսը։

Ըստ նրա՝ շատ դժվար է լինելու 850 հազար մարդ բերել ընտրատեղամաս, որից 650 հազարն էլ ասի՝ այո։ Քաղտեխնոլոգի կարծիքով՝ «Այո»-ին մնացել է երեք ճանապարհ՝ մանիպուլյատիվ տեխնոլոգիաների կիրառումը, որ արդեն սկսվել է, վարչական ռեսուրսի օգտագործումը, ընտրանկարչությունը։ «Շատ թույլ է «Այո»-ի մոտիվացիան, որը պետք է ստիպի 850 հազար մարդու գնա ընտրատեղամաս եւ 650 հազարն էլ ասի այո։ «Ոչ»-ը գրագետ աշխատելու դեպքում ունի հաղթելու հնարավորություն»,- ասել է քաղտեխնոլոգը։

Մանրամասները՝ տեսանյութում

Աղբյուր` Փաստինֆո