Փաստ ինֆո

«Իմ գնահատմամբ անթույլատրելի են նման գնահատականները, որովհետեւ ձեւավորվում է մի իրավիճակ, որ բոլոր այն ուժերը՝ լինեն ներպետական ընդդիմադիր քաղաքական ուժեր, մասնագիտական հանրություն, անգամ արդեն միջազգային կառույցներ, եթե չեն կիսում իշխող ուժի դիրքորոշումը որեւէ հարցի շուրջ, ուրեմն ենթակա են պիտակավորման, նրանց կարելի է մեղադրել ինչ-ինչ չարաշահումների մեջ՝ ձեւավորելով հանրային տրամադրություններ»,-«Փաստինֆո»-ի հետ զրույցում ասաց սահմանադրագետ, «Պառլամենտարիզմի միջազգային կենտրոն» ՀԿ համահիմնադիր Գոհար Մելոյանը՝ անդրադառնալով ՀՀ վարչապետ Նիկոլ Փաշինյանի՝ Վենետիկի հանձնաժողովի վերաբերյալ հնչեցրած հայտարարություններին։

Գոհար Մելոյանը շեշտեց, որ Վենետիկի հանձնաժողովը ԵԽ-ի սահմանադրական իրավունքով մասնագիտացված մարմինն է՝ կազմված ԵԽ անդամ տարբեր երկրների հեղինակավոր մասնագետներից եւ վայելում է բարձր հեղինակություն. «Նմանաբնույթ պիտակավորումները մի կառույցի, որն իր վարկանիշն իր գործունեությամբ է ձեռք բերել, անթույլատրելի է եւ բնականաբար, հետարձագանք պետք է ունենա եւ անդրադառնալու է մեր պետության միջազգային հեղինակության ու վարկանիշի վրա»։

Հիշեցնենք, երեկ Հանրային Հ/Ը եթերում վարչապետ Նիկոլ Փաշինյանը, անդրադարձել է հարցին, թե ինչու սահմանադրական հանրաքվեի մասին նախագիծը իշխանությունը չի ուղարկում Վենետիկի հանձնաժողով՝ փորձաքննության ու նշել, որ Գերմանիա կատարած վերջին այցի ընթացքում իրավիճակի վերաբերյալ քննարկումներ է ունեցել գործընկերների հետ:

«Կարող եմ ասել, նրանք զարմացած են, որ ՀՀ-ում այս տրանսֆորմացիայի շրջանում այսպիսի պրոցեսներ են տեղի ունեցել: Ես չեմ ուզում թաքցնել, նաև եվրոպացի գործընկերների ուշադրությանն եմ հրավիրել այս ողջ պրոցեսին, որով, ըստ էության, իրավունքի չարաշահման հստակ դեպքի հետ գործ ունենք կապված այս տրանսֆորմացիոն երևույթի հետ: Այն տեղի է ունեցել Վենետիկի հանձնաժողովի ներքո, և ես կարծում եմ, որ մինչև այդ հարցին մենք կանդրադառնանք, Վենետիկի հանձնաժողովը պետք է պատասխանի որոշ հարցերի՝ այդ թվում եվրոպացի մեր գործընկերներին»,- հայտարարել է Փաշինյանը։

Սա, փաստացի մեղադրանք էր՝ ուղղված միջազգային հեղինակավոր կառույցին, որը, հիշեցնենք, ԱԺ արտահերթ նիստի օրը, երբ իշխող մեծամասնության նախաձեռնությամբ քննարկվում էր ՍԴ 7 դատավորներից լիազորությունները դադարեցնելու հարցը հանրաքվեի դնելու նախագիծը, հորդորել էր ՀՀ իշխանություններին նախագիծն անհապաղ ուղարկել Վենետիկի հանձնաժողով՝ փորձաքննության։ Անսալով այս կոչը, իշխող ուժը առանց միջազգային փորձաքննության, ընթացակարգային ու սահմանադրական նորմերի խախտումներով ընդունեց հանրաքվեի դնելու որոշման նախագիծը։

Սահմանադրագետը շեշտեց՝ վարչապետի հայտարարությունները ակնհայտ հակասահմանադրական գործընթացից հանրության ուշադրությունը շեղելու եւ հանրությանը մոլորեցնելու փորձեր են։

«Հանրությանը հակասահմանադրական փաստաթուղթ է հրամցվում՝ ուղղված ՍԴ-ի՝ իշխանությանը ոչ հաճո անդամներից ձերբազատվելուն, որոնց նկատմամբ տարբեր ճնշումներ գործադրվեցին, օրենքներ շրջանցվեցին եւ ի վերջո, որոշում կայացվեց անցկացնել հանրաքվե ՝ հակաիրավական ճանապարհով։ Այս ամենին զուգահեռ, արդեն իսկ տեսնում ենք, որ հանրությանը ապատեղեկատվություն է մատուցվում, փորձ է արվում օգտագործել հանրության էմոցիոնալ ֆոնը՝ շեղելով հանրաքվեի բուն էությունը, նշելով, թե սա կրկին պայքար է անցյալի դեմ, անձնավորում են՝ հասկանալով մարդկանց էմոցիոնալ մոտեցումը»,-ասաց Գոհար Մելոյանը։

Սահմանադրագետի խոսքով, այսօրինակ վարքագիծն ուղղակի անթույլատրելի է, մարդկանց պետք է պարզ եւ մատչելի բացատրվի, թե իրենք ինչ հանրաքվեի են մասնակցելու. «Ցավոք մենք հակառակ պրոցեսն ենք տեսնում, այս հարցի լուծումը թողնելու են ժողովրդին, որի մեծամասնությունը անգամ տեղյակ չէ, թե ինչ հարցի վերաբերյալ է կարծիք կազմելու» ։

Գոհար Մելոյանը վտանգավոր համարեց միտումը, որ ներքին լսարանի համար այն ամենը, ինչ դեմ է իշխող ուժին , արժեզրկվում է եւ պիտակավորվում.«Հետագայում, երբ այդ արտաքին միջազգային կառույցները ինչ-որ նոր հարցերի վերաբերյալ կարծիքով հանդես գան, պետական կառավարման մարմինները չեն կարողանալաու բացատրել իրողությունը կամ արդարանալ, թե ինչու այսպես եղավ»։

Սահմանադրագետը համոզված է , որ միջազգային հանրությունը քաջատեղյակ է ՀՀ-ում ընթացող ներքին զարգացումներից եւ առաջիկայում երկիրն զգալու է դրա իրավական հետեւանքները։ «Արդեն իսկ ՄԻԵԴ-ը ունի ձեւավորած պրակտիկա հենց դատավորների լիազորությունները դադարեցնելու վերաբերյալ Եվ , եթե «Այո»-ն հաղթի, կնշանակի, որ իրենց իրավունքների պաշտպանության ներպետական մեխանիզմները ՍԴ 7 դատավորների համար առկա չեն։ Իրենք դիմելու են ՄԻԵԴ, որը իր բացի այն, որ նմանաբնույթ գործերով պարտավորեցրել է պետությանը հատուցել նյութական ու բարոյական վնասները, նաեւ պարտավորեցրել է վերականգնել տվյալ դատավորների լիազորությունները»,նշեց Գոհար Մելոյանը ՝ նկատելով, որ ստեղծվելու մի իրավիճակ, երբ միեւնույն ժամանակ հանրաքվեի արդյունքում ձեւավորվել է նոր ՍԴ, մյուս կողմից ՍԴ 7 դատավորները որոշել են վերականգնել իրենց լիազորությունները։

Իսկ հետագայում, ըստ սահմանադրագետ, իշխանության եկած նոր քաղաքական ուժերը, որոնք փոխարինելու են գործող իշխանությանը, կրկին կբարձրացնեն հանրաքվեի եւ դրա արդյունքում ձեւավորված ՍԴ-ի լեգիտիմության խնդիրը, ինչը, ըստ մասնագետի, տվյալ պարագայում արդարացի կլինի։

Աղբյուր` Փաստինֆո