Փաստ ինֆո

«Այդ համեմատությունն անում է մի մարդ, ով Նաիրի Հունանյանի մոտ մարդիկ է ուղարկում ՝պատգամավորներ, ով Նաիրի հունանյանից ստանում է նամակներ, ով ազատել է ահաբեկչական խմբավորմանը, հանդիպել է այդ ահաբեկչական խմբավորման ղեկավարի հետ»,- «Փաստինֆո»-ի հետ զրույցում ասաց «Քաղաքացիական գիտակցություն» ՀԿ նախագահ Նարեկ Սամսոնյանը՝ անդրադառնալով ՀՀ վարչապետ Նիկոլ Փաշինյանի՝ նախօրեին արած հայտարարություններին։

Փաշինյանը Հանրային Հ/Ը տաղավարում խոսելով ոստիկանության գործողություններից ասել էր. « Իրավապահ մարմինները ունեն ծայրահեղականացումը կանխարգելելու և նախականխելու մշակույթ։ Ինչի՞ որ Նաիրի Հունանյանին երկու անգամ բերման ենթարկած լինեին արդյունքը լավ կլինե՞ր, թե վատ։ Կան մարդիկ, սուբստանցիաներ, ովքեր չեն հասկանում ուրիշ լեզու։ Այդ մարդկանց ես խորհուրդ եմ տալիս սկսել ջութակ նվագել սովորել, որպեսզի ավելի քաղաքակիրթ բառապաշար սկսեն հասկանալ»։

Վարչապետի այս հայտարարությունն ըստ էության վերաբերում էր իրեն քննադատող տարբեր նախաձեռնությունների անդամներին, որոնց վերջին շրջանում տարբեր կասկածներով բերման ենթարկվեցին ոստիկանություն, ապա ազատ արձակվեցին։ Խոսքը «ՎԵՏՕ» շարժման համակարգողի, «Ադեկվադ»-ների,

«Քաղաքացիական գիտակցություն» ՀԿ նախագահի մասին է։

Նարեկ Սամսոնյանի խոսքով, եթե ելնենք Փաշինյանի հայտարարության մեջ հնչած տեսակետից, ինքը Փաշինյանը ակնհայտորեն ջութակ նվագել չգիտի եւ դժվար էլ երբեւեէ սովորի։ «Քաղաքական դաշտում նաիրիհունանյանիզմը ամբողջությամբ բնորոշ է իրեն եւ ինքը տեռորիստների հովանավոր է, Նաիրի Հունանյանից նամակ ստացողը»։

Նաիրի Հունանյանի հետ համեմատությունը Նարեկ Սամսոնյանը համարեց վարչապետի հերթական անպատասխանատու եւ բարոյական, էթիկական ու քաղաքական նորմերից դուրս հայտարարությունը, որը ամբողջությամբ բնորոշ է Նիկոլ Փաշինյան քաղաքական գործչին։

«Նա իր գործունեության ընթացքում մշտապես դրսեւորել է նմանատիպ անպատասխանատվություն»։

Անդրադառնալով վարչապետի ձեւակերպմանը, թե «կան մարդիկ, սուբստանցիաներ, ովքեր չեն հասկանում ուրիշ լեզու», Նարեկ Սամսոնյանն ասաց, որ սրանով վարչապետը փաստացի խոստովանեց, որ իր հրահանգով են կատարվում բոլոր նմանատիպ ապօրինի ու անօրինական գործողությունները։

« Վաղը մյուս օրը այդ լեզվով կխոսեն իրական հանցագործների եւ ոչ թե նրանց հետ, ովքեր այս պահին Փաշինյանի պոպուլիստական ռեժիմի քաղաքական ընդդիմախոսն են։ Այնպես որ, խորհուրդ եմ տալիս Փաշինյանին՝ իր իսկ մետաֆորի տրամաբանության շրջանակում հնարավորինս արագ սովորել ջութակ նվագել»,- նշեց Նարեկ Սամսոնյանը։

Աղբյուր` Փաստինֆո