Փաստ ինֆո

Նիկոլ Փաշինյանը բացարձակ պատրաստ չէր Ալիևի հետ հանդիպմանը։ Այս մասին հրավիրված ասուլիսին ասաց քաղաքագետ Գագիկ Համբարյանը։

«Ե՛վ ինքը, և՛ իր աշխատակազմը պետք է նախօրոք կանխատեսեին, թե ինչ հարցեր էին բարձրաձայնելու Ադրբեջանի կողմից, քանի որ Իլհամ Ալիևը բացարձակ չթաքցրեց, որ առաջ է տանելու նույն կեղծ թեզերը, որոնցով ինքն առաջնորդվում է»,- ասաց Համբարյանը՝ հավելելով, որ մեր բախտը բերեց նրանից, որ Ալիևն էլ այդքան շատ պատրաստված չէր այս հանդիպմանը, քանի որ չարձագանքեց Փաշինյանի երկու, բավականին, կոպիտ սխալներին։

Համբարյանն առանձնացրեց Փաշինյանի սխալները, որոնցից առաջինն այն է, որ, իբր թե նա կարդացել էր «Аргументы и факты» թերթում, որ Ադրբեջանի նախկին նախագահ Այազ Մութալիբովը հարցազրույց էր տվել և բացահայտել էր Խոջալուի դեպքերի ընթացքում ադրբեջանական զինուժի ակտիվ մասնակցությունը՝ խաղաղ բնակչության կոտորածների մեջ, այնինչ՝ դա այլ լրատվականում էր։ Համբարյանի խոսքով՝ երկրորդ կոպիտ սխալը, որը թույլ է տվել Փաշինյանը, այն էր, որ Շահումյանի շրջանը 100 տոկոսով բնակեցված է եղել հայերով։

«1989թ. մարդահամարի տվյալներով՝ Շահումյանի շրջանի 20.000 բնակչությունից 17.000-ը եղել են հայեր, 3000-ը՝ ադրբեջանցիներ»,- ասաց քաղաքագետը։
Անդրադառնալով՝ Ալիևի կողմից բարձրաձայնված հարցերին, որոնց Փաշինյանը չի արձագանքել, Համբարյանն ասաց, որ Փաշինյանը համաձայնվեց Ալիևի այն թեզի հետ, որ Հայաստանում եղել է 300.000 ադրբեջանցի, որոնք դարձել են փախստական, մինչդեռ՝ մարդահամարի տվյալներով ՀՀ-ում բնակվում էր 168.000 ադրբեջանցի և Փաշինյանն, այս թիվը գիտենալով, պետք է հակադարձեր։

Քաղաքագետն ընդգծեց, որ ադրբեջանական կողմն առաջին անգամ թիվը հասցրեց 300.000-ի, որովհետև Հեյդար և Իլհամ Ալիևների կառավարման տարիներին թիվը տատանվում էր 200- 250 հազարի միջև։

«Եթե Հայաստանի իշխանությունները շարունակեն նույն պասիվ կեցվածքը՝ չարձագանքելու, ապա չեմ զարմանա, որ վաղը մյուս օրը պարզվի, որ Հայաստանում ընդհանրապես հայեր չեն էլ ապրել և բոլորն ադրբեջանիցներ էին»,- ասաց քաղաքագետը։

Բացի այդ՝ վերջին նշեց, որ Փաշինյանը բացարձակապես տեղյակ չէ, թե 1989թ դրությամբ ինչ էթնիկ վիճակ է եղել Արցախում։

«Ալիևը կրկին կեղծեց մարդահամարի տվյալները՝ ավելացնելով ադրբեջանցիների թիվը մոտավորապես 8000-ով, իսկ հայերի թիվը պակասեցրեց 6000-ով»,- ասաց քաղաքագետը։

Աղբյուր` Փաստինֆո