Փաստ ինֆո

ՀՀ ֆինանսների նախկին նախարար, ՊԵԿ նախկին նախագահ Գագիկ Խաչատրյանի առողջության վերաբերյալ դատարանին կեղծ փաստաթղթեր տրամադրելու կապակցությամբ Գագիկ Խաչատրյանի պաշտպանները հարցումներ են ուղարկել։ Այս մասին «Փաստինֆո»-ի հետ զրույցում ասաց Գագիկ Խաչատրյանի պաշտպան Երեմ Սարգսյանը՝ նշելով, որ պատասխան դեռևս չեն ստացել։

Հիշեցնենք, որ փետրվարի 6-ին ՀՀ վերաքննիչ քրեական դատարանը՝ դատավոր Սերգեյ Մարաբյանի նախագահությամբ, մերժել օր փաստաբանների բողոքը ու անփոփոխ թողել Գագիկ Խաչատրյանի նկատմամբ որպես խափանման միջոց կալանավորումն ընտրելու մասին ընդհանուր իրավասության դատարանի որոշումը։

Գագիկ Խաչատրյանի պաշտպան Երեմ Սարգսյանը հայտարարել է, որ պետական իրավասու մարմիններն անտեսում են ՀՀ Ֆինանսների նախկին նախարար, ՊԵԿ նախկին նախագահ Գագիկ Խաչատրյանի առողջական ծանր վիճակը և չեն ապահովում բժշկական օգնություն ստանալու նրա իրավունքը՝ թույլ չտալով ստանալ բժիշկների կողմից նշանակված պարտադիր ստացիոնար բուժումը: Ավելին, ըստ նրա, Գագիկ Խաչատրյանի բժշկական օգնությունը չապահովելու համար իրավասու մարմինները նույնիսկ չեն տարակուսել Վերաքննիչ դատարանին իրականությանը չհամապաստասխանող բովանդակությամբ ինչ-որ փաստաթուղթ ներկայացրել այն մասին, թե իբրև Գագիկ Խաչատրյանին առաջարկվել է տեղափոխվել և անհրաժեշտ ստացիոնար բուժումը ստանալ «Դատապարտյալների հիավանդանոց» ՔԿ հիմնարկում, սակայն վերջինս հրաժարվել է տեղափոխվել այնտեղ:

Ե.Սարգսյանն այսօր «Փաստինֆո»-ին հայտնեց, որ հարցումներին ի պատասխան համապատասխան պարզաբանումները ստանալուց հետո դիրքորոշում կներկայացնեն։

Հարցին, թե այս պահին ինչպե՞ս է գնահատվում Գագիկ Խաչատրյանի առողջական վիճակը, Սարգսյանն ասաց, որ նա համապատասխան բուժում է ստանում այնքանով, որքանով հնարավոր է այս պահին ապահովել։

«Բուժում է ստանում։ Այնպես չէ, որ դրական դինամիկա կա։ Բուժումն անհրաժեշտ է»,- ասաց պաշտպանը։

Հիշեցնենք, որ ՀՀ ֆինանսների նախկին նախարար, Պետական եկամուտների կոմիտեի (ՊԵԿ) նախկին նախագահ Գագիկ Խաչատրյանն արդեն յոթ ամիս է, ինչ կալանքի տակ է։ Նա մեղադրվում է 2008-2014թթ. պետական գործունեության ընթացքում թույլ տված ենթադրյալ պաշտոնեական դիրքի չարաշահման և գույքի վատնման գործով։ Խաչատրյանը չի ընդունում իրեն առաջադրված մեղադրանքը, և նրա փաստաբանական խումբը պնդում է, որ դատարանի տրամադրության տակ չի եղել և դատաքննության ժամանակ դատարանը չի հետազոտել գոնե մեկ ապացույց, որը հնարավորություն կտար ողջամիտ ենթադրություն անել, որ Գագիկ Խաչատրյանին ՀՀ Քրեական օրենսգրքի 179-րդ հոդվածի 3-րդ մասի 1-ին կետով առաջադրված մեղադրանքում նշված հանցագործությունը ընդհանրապես տեղի է ունեցել, և որ Գագիկ Խաչատրյանը որևէ առնչություն ունի դրա հետ:

Կալանավորումից առաջ Գագիկ Խաչատրյանը գտնվել է Գերմանիայի Դաշնությունում և քննիչի առաջին իսկ հեռախոսազանգով ժամանել Երևան։ Խաչատրյանը Գերմանիայում հետվիրահատական բուժում էր ստանում. նա ողնաշարի և հենաշարժողական ապարատի հետ խնդիրներ ունի, մարմնում իմպլանտ է տեղադրված։

Հեղինակ՝ Իզաբել Սահակյան

Աղբյուր` Փաստինֆո