Փաստ ինֆո

Միայն Լևոն Տեր-Պետրոսյանն է պարզ արտահայտվել, որ ազատագրված տարածքները պետք է տրվեն Ադրբեջանին։ Երկրորդ և երրորդ նախագահները փորձում էին պահպանել ստատուս քվոն նյութական առումով, սակայն իրավական փաթեթում մնացել են ամբողջովին նահանջողական ձևակերպումներ, օրինակ ազատագրված տարածքները մինչև հիմա էլ կոչվում են անվտանգության գոտի։ Այս մասին այսօր հրավիրված ասուլիսում ասաց առաջին ՄԻՊ Լարիսա Ալավերդյանը։

Նա նշեց, որ միայն ՀՀ երկրորդ նախագահ Ռոբերտ Քոչարյանն է Ստրասբուրգի իր ելույթում ասել, որ ԼՂՀ-ն երբևէ չի պատկանել Ադրբեջանին և ժամանակակից ԼՂՀ-ն չի կարող Ադրբեջանի ուղղահայաց ենթակայության ներքո լինել։

«Դրանից հետո մենք ունեցել ենք երրորդ նախագահ, որն ամեն ճառի ժամանակ կամ փորձել է ստատուս քվոն պահպանել, կամ ինչ-որ սխալ արտահայտություն է թույլ տվել, որին չգիտես ինչու հղում է անում Նիկոլ Փաշինյանը՝ թերթը մեջբերելով»,-ասաց Ալավերդյանը։

Նա ընդգծեց, որ Մյունխենյան սկզբունքները պետք է համարել Հայաստանի նոր իշխանությունների դիրքորոշումն արտահայտելու տապալված փորձ. «Ես կոչ եմ անում նոր իշխանություններին, որ ասեն, խոստովանեն, որ դա տապալված է, որովհետև այնտեղ չկա անկախության խոսք, իսկ ԼՂՀ-ն ինքնորոշման համար չէ, որ պայքարում է, նա անկախության համար է պայքարում»։

Ալավերդյանի կարծիքով, պետք է հրավիրվի համահայկական համաժողով, որտեղ համահայկական քննարկման կդրվի Արցախի հիմնահարցը։

«Իմ համոզմունքով, համայն հայությունը, որը 2 անգամ իրեն պատերազմ հայտարարած Ադրբեջանին ցույց է տվել՝ ով ի՞նչի տեր է, և Իլհամ Ալիևին, որը խայտառակ ձևով է տանուլ տվել Արցախյան պատերազմը։ Նրանք խայտառակվել են յուր ժողովրդի առաջ,այն դեպքում, երբ ունեցել են զոհեր կամ վիրավորներ, չեն հավաքել այդ մարմինները, թող էին մարտի դաշտում, իսկ երբ հայերը փորձում էին հանել, Ադրբեջանցիները կրակում էին հայերի վրա»,-ասաց առաջին

ՄԻՊ-ն ու ավելացրեց, որ այդպիսի պետության ղեկավարն այդքան ինքնավստահ, ինքնասիրահարված չպետք է պահեր իրեն բանավեճի ժամանակ։

Ըստ Ալավերդյանի, Ալիև նման կերպ պահելը պատճառաբանվում է նրանով, որ Ադրբեջանի ղեկավարը չի տեսնում, որ դիմացինը տիրապետում է այդ ամբողջ ինֆորմացիային։

Աղբյուր` Փաստինֆո