Փաստ ինֆո

ՀՀ երրորդ նախագահ Սերժ Սարգսյանի գործով առաջին դատական նիստը տեղի կունենա փետրվարի 25-ին։ Այս մասին «Փաստինֆո»-ն տեղեկացավ «Դատալեքս» դատական տեղեկատվական համակարգից։

Ինչպես արդեն տեղեկացրել ենք՝ ՀՀ երրորդ նախագահ Սերժ Սարգսյանի և մյուսների գործը մակագրվել է Երևանի ընդհանուր իրավասության դատարանի դատավոր Վահե Միսակյանին։

Վահե Միսակյանը 2017 թվականից եղել է Շիրակի մարզի ընդհանուր իրավասության դատարանի դատավոր, իսկ 2019 թվականի վերջին նշանակվել Երևանի ընդհանուր իրավասության դատարանի դատավոր։ Helpcourt հարթակում նրա վարկանիշը 15 է։

Նշենք, որ քրեական գործով անցնում են նաև Գյուղատնտեսության նախկին նախարար Սերգո Կարապետյանը, «Ֆլեշ» ընկերության սեփականատեր Բարսեղ Բեգլարյանը։

ՀՀ երրորդ նախագահ Սերժ Սարգսյանին մեղադրանք առաջադրվելու մասին ՀՔԾ-ն հայտարարեց 2019 թվականի դեկտեմբերի 4-ին: Ըստ պաշտոնական հաղորդագրության` զբաղեցնելով ՀՀ նախագահի պաշտոնը, նա իր պաշտոնեական դիրքն օգտագործելով, 2013 թվականին կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489.160.310 ՀՀ դրամի հափշտակության կատարումը:

Նրան մեղադրանք է առաջադրվել` ՀՀ քրեական օրենսգրքի 38-179-րդ հոդվածի 3-րդ մասի 1-ին կետով եւ որպես խափանման միջոց է ընտրվել ստորագրություն՝ չհեռանալու մասին։

Նույն օրը՝ փետրվարի 25-ին, Աննա Դանիբեկյանի նախագահությամբ կշարունակվի նաեւ ՀՀ երկրորդ նախագահ Ռոբերտ Քոչարյանի գործով դատական նիստը, որտեղ շարունակվում է քննարկվել  գործով ներգրավված մեղադրյալների նկատմամբ քրեական հետապնդումը դադարեցնելու մասին միջնորդությունները։

Աղբյուր` Փաստինֆո