Փաստ ինֆո

Արդեն ժամանակն է սթափվել և հասկանալ, որ հեղափոխություններն Եվրոպայում ավարտվել են անցած դարում։ Այսօր նման հայտարարությամբ է հանդես եկել Հայաստանի առաջին ՄԻՊ Լարիսա Ալավերդյանը՝ անդրադառնալով Մյունխենյան հանդիպման ընթացքում Արցախի հարցի վերաբերյալ Ալիեւի հայտարարություններին ի պատասխան հեղափոխության մասին Փաշինյանի հնչեցրած դիտարկումներին։

Տիկին Ալավերդյանը նախ կոպտագույն սխալ որակեց այն թեզը, թե Արցախը 90-ականներին ինքնորոշվել է։ «Դա սխալ է, որովհետև 92 թվականին արդեն Ադրբեջանի անկախացումն է եղել։ Արցախն արդեն ունեցել է իր ինքնորոշված կարգավիճակը, Ադրբեջանը ոտնահարել է այն ու փորձել է մերժել այդ ինքնորոշված իրավունքը»,- ասաց Լարիսա Ալավերդյանը։

Նա նշեց՝ Ադրբեջանը պետք է պատասխանատվության ենթարկվի, քանի որ արդեն իրացված իրավունքը ոտնահարել է։

«Ալիևն ասաց, որ կապահովեն անվտանգությունը հայերի, ինչպես ապահովում են այլ ազգային փոքրամասնությունների իրավունքները։ Հայերն Ադրբեջանում երբևէ չեն եղել փոքրամասնություն։ Հայերը պետականաստեղծ ազգ են»,-ասաց Ալավերդյանը։

Նա հռետորական հարց բարձրացրեց, թե ինչու է Նիկոլ Փաշինյանը համաձայնել մասնակցել նման հանդիպման՝ առանց խորհրդակցելու սեփական ժողովրդի հետ և սկզբունքները համաձայնեցնելու. «Միշտ մեզ էլ, իրենց էլ զգուշացնում են կարևորագույն ոլորտների կամ հարցերի մասին։ Առնվազն վերջին հարցը, թե ինչ եք ակնկալում միջազգային հանրությունից, դա անպայման հայտնի էր և՛ Ալիևին, և՛ Փաշինյանին»։

Նրա խոսքով, Իլհամ Ալիևն իր ամբողջ նկրտումները շարադրեց, ասում է, թե ինչին է համաձայն ու շատ պարզ արտահայտվում է։

«Դրան ի պատասխան Հայաստանը խոսեց հեղափոխությունների մասին՝ միկրո, մինի։ Ես կարծում եմ, արդեն ժամանակն է սթափվել և հասկանալ, որ հեղափոխություններն Եվրոպայում ավարտվել են անցած դարում։ Երբ հեղափոխության մասին խոսում ես 21-րդ դարում, այն էլ միայն ներսում տեղի ունեցած հեղափոխության, այլև բանակցային պրոցեսում, հավատացեք, դա անլուրջ է ընդունվում։ Ի՞նչ հեղափոխությունների մասին է խոսքը բանակցային գործընթացում, որտեղ քայլ առ քայլ արվում են այնպիսի փորձեր, որպեսզի գան ինչ-որ եզրակացության»,-ասաց առաջին ՄԻՊ-ը։

Հեղինակ՝ Սոնա Գեւորգյան

Աղբյուր` Փաստինֆո