Փաստ ինֆո

«5-րդ ալիք» ՀԸ սեփականատեր Արմեն Թավադյանի կալանքի ժամկետը ևս երկու ամսով երկարացնելու համար հիմքեր չկան։ Այս մասին «Փաստինֆո»- հարցին ի պատասխան ասաց Թավադյանի պաշտպան Արամ Օրբելյանը։

Չանդրադառնալով ներկայացված նյութերի դետալներին՝ Օրբելյանն ասաց, որ, ըստ էության, որևէ նոր բան չի ներկայացվել կամ ներկայացվել են մի քանի հատ ինչ-որ արհեստական փաստաթղթեր, որի շրջանակներում ներկայացվել է պաշտպանական կողմի դիրքորոշումը։ Օրբելյանը վստահեցրեց, որ չկա թաքնվելու կամ գործի քննությանը խոչընդոտելու որևէ ռիսկ, բացակայում է հիմնավոր կասկածը։

«Մոդելը, որ երկու հոգի, ենթադրվում է, որ խումբ են ձևավորել, մեկը կալանքի տակ է, մյուսը՝ կալանքի տակ չէ, ընդունելի չէ։ Մեր գնահատմամբ՝ հաշվի առնելով այս գործի շրջանակներում կատարվող գործընթացները, գտնում ենք, որ սա կապված է պարոն Թավադյանի մեդիագործունեության հետ, այսինքն՝ սա խոսքի ազատությունը լռեցնելու փորձ է։ Հաշվի առնելով, որ «5-րդ ալիք» ՀԸ-ն նոր է ձեռք բերվել և դեռևս ներդրումների փուլում է, հիմա սառեցված են անձնական հաշիվները, հնարավորություն չկա հավելյալ ներդրումներ անելու, փորձ է կատարվում «5-րդ ալիք»-ի հնարավորությունները խոչընդոտել։ Համապատասխանաբար՝ կարծում ենք, որ սա կապված է Թավադյանի քաղաքական-հասարակական գործունեության հետ»,- ասաց Օրբելյանը։

Վերջինիս խոսքով՝ նիստի ընթացքում բերվել են բոլոր փաստարկները։

«Հուսանք, որ դատարանը, չնայած այն ամենին, որ կա տվյալ դատարանի նկատմամբ փաստաբանական համայնքում կարծիք, հուսանք, որ դատարանն այս անգամ վեր կգտնվի այդ՝ կախվածությունից, ներքին ցենզուրայից, թե արտաքին ճնշումներից, չեմ ուզում ենթադրել, թե դա ինչ է»,- ասաց պաշտպանը՝ հավելելով, որ այն, որ գործադիրի կողմից կալանքի միջնորդություն է բերվել, ինքնին արդեն ընդունելի չէ։

Աղբյուր` Փաստինֆո