Փաստ ինֆո

Սահմանադրական դատարանում շարունակվում է ՄԻՊ-ի և ՀՀ վարչական դատարանի դիմումների հիման վրա՝ «Ոստիկանությունում ծառայության մասին» ՀՀ օրենքի 43-րդ հոդվածի 9-րդ մասի 2-րդ պարբերության, «ՀՀ ոստիկանության կարգապահական կանոնագիրքը հաստատելու մասին» ՀՀ օրենքի 16.1-ին հոդվածի 1-ին մասի՝ Սահմանադրությանը համապատասխանության հարցը որոշելու վերաբերյալ նիստը՝ բանավոր ընթացակարգով։ Նիստին բացակայում է դատավոր Վահե Գրիգորյանը։

Դիմումատուն՝ ՄԻՊ Արման Թաթոյանը հայտարարեց, որ լիազորությունների կասեցման պատճառով ոստիկանության ծառայողը զրկված է լինում թե՛ աշխատավարձից, թե՛ այլ պաշտոնի նշանակվելու, թե՛ սեփական նախաձեռնությամբ աշխատանքից ազատվելու հնարավորությունից, բացի այդ՝ չի կարողանում համատեղությամբ կատարել այլ աշխատանք՝ բացի գիտամանկավարժական գործունեություն իրականացնելուց։ Արդյունքում՝ զրկվում է ապրուստի միջոց հայթայթելու իրավունքից։

Նրա խոսքով՝ Սահմանադրությամբ ամրագրված է, որ յուրաքանչյուր ոք ունի աշխատանքի ազատ ընտրության իրավունք և աշխատանքից անհիմն ազատման դեպքում՝ պաշտպանության իրավունք։

Հարցի վերաբերյալ ոստիկանության ներկայացրած պարզաբանումները, ըստ ՄԻՊ-ի, վկայում են ոստիկանության համակարգում առկա հակասահմանադրական պրակտիկայի մասին։

Ավելի վաղ հայտնել ենք, որ Ոստիկանության՝ լիազորությունները կասեցված մայոր Նշան Թադեւոսյանին՝ աշխատավարձ չտրամադրելու և իր դիմումի հիման վրա աշխատանքից ազատվելու արգելքի մասին դիմումում վիճարկվում է «Ոստիկանությունում ծառայության մասին» ՀՀ օրենքի 43-րդ հոդվածի 9-րդ մասի 2-րդ պարբերությամբ ամրագրված դրույթի և «Հայաստանի Հանրապետության ոստիկանության կարգապահական կանոնագիրքը հաստատելու մասին» ՀՀ օրենքի 16.1-րդ հոդվածի 1-ին մասի սահմանադրականության հարցը։

Բանն այն է, որ Նշան Թադեւոսյանը, ծառայելով ՀՀ ոստիկանության ճանապարհային ոստիկանության ճանապարհապարեկային ծառայության 1-ին սպայական գումարտակի 5-րդ սպայական դասակում՝ ավագ տեսուչի պաշտոնում, 2018 թվականին որպես մեղադրյալ է ներգրավվել ՀՔԾ-ում քննվող մի քրեական գործի շրջանակում, որ հարուցվել է ՀՀ ՔՕ-ի 311-րդ հոդվածի 3-րդ մասի 1-ին և 3-րդ կետերի՝ խոշոր չափերով կաշառքի շորթման և 308-րդ հոդվածի 1-ին մասի՝ պաշտոենական լիազորությունները չարաշահելու հատկանիշներով։ Դրանից հետո նրա լիազորությունները դադարեցվել են, եւ օրենքի պահանջով նա աշխատավարձ չի ստացել բացառությամբ առաջին երկու ամսվա։

Նշենք, որ «Ոստիկանությունում ծառայության մասին» ՀՀ օրենքի 43-րդ հոդվածի 9-րդ մասի համաձայն՝ ծառայողական քննության ժամանակահատվածում ոստիկանության ծառայողի լիազորությունները կարող են ժամանակավորապես դադարեցվել, եթե բավարար հիմքեր կան ենթադրելու, որ պաշտոնում մնալով նա կխոչընդոտի ծառայողական քննությանը: Այդ դեպքում նրան վճարվում է աշխատավարձ: Ոստիկանության ծառայողի նկատմամբ քրեական հետապնդում իրականացվելիս լիազորությունների ժամանակավորապես կասեցումը կատարվում է մինչև քրեական գործի ավարտը կամ մինչև տվյալ գործով դատարանի դատավճռի օրինական ուժի մեջ մտնելը: Այդ դեպքում աշխատավարձը վճարվում է մինչև երկու ամսվա համար, իսկ մնացած վճարումը կատարվում է գործի` արդարացնող հիմքով ավարտի դեպքում:

Ըստ հայցվորի՝ սույն դրույթը խախտել է իր մասնավոր և ընտանեկան կյանքի անձեռնմխելիության իրավունքը և իրեն զրկել է արժանապատիվ՝ նույնիսկ նվազագույն գոյության հնարավորությունից

Աղբյուր` Փաստինֆո