Փաստ ինֆո

Եթե մարդ կարծում է, որ այս հանրաքվեի գործընթացը հակասահմանադրական է և պատրաստվում է դրան մասնակցել, ապա դա նրա ո՛չ ներկայի, ո՛չ անցյալի գործունեության մասին լավ բաներ չի հուշում։ Այսինքն մարդը հոգեբանորեն պատրաստ է ապօրինության մասնակցել։ Այս մասին այսօր լրագրողների հետ ճեպազրույցում ասաց Վահագն Հովակիմյանը՝ անդրադառնալով «Ոչ»-ի շտաբի նախաձեռնությանը։

«Ես ցավում եմ պարոն Մելիքյանի համար, որ նա հակասահմանադրական գործընթացի մասնակից է դառնում, դա իր ընկալմամբ։ Եթե նա պատրաստ է ապօրինությամբ զբաղվել, դա իր ընտրությունն է, ես ասում եմ, որ այս գործընթացը Սահմանադրության տառին և ոգուն համապատասխան է։ Եվ ես դրա համար եմ սրան մասնակից»,-ասաց Հովակիմյանը։

Նա ընդգծեց՝ եթե մարդը կարծում է, որ գործընթացը հակաօրինական է ու մասնակցում է դրան, դա նշանակում է, որ մշտապես պատրաստ է մասնակցել հակաօրինական գործընթացի։
Խոսելով քարոզչական գործընթացների մասին՝ նա նշեց, որ շտաբում կոնկրետ աշխատանքային խումբ է ստեղծվել, որը զբաղվում է քարոզչական գործընթացներով. «Այսինքն իրենք են պլանավորելու, ես ինքս դրա մասնագետը չեմ, ինքս չեմ կարող դրանով զբաղվել, հազիվ հասցնեմ այս կազմակերպչական հարցերով զբաղվել ու լրագրողների հարցերին պատասխանել»։

Աղբյուր` Փաստինֆո