Փաստ ինֆո

Դեռ անցած տարի «5-րդ ալիք» ՀԸ զանգ է ստացվել վարչապետի աշխատակազմից, որտեղից մեղադրում էին, որ լրատվամիջոցը չի լուսաբանել վարչապետի փայլուն այցը Չինաստան, այլ ընդամենը՝ լուսաբանվել է բադ ուտելու պրոցեսը։ Այս մասին «Մամուլի հետհեղափոխական մարտահրավերները. ասելիքներն ու անելիքները» թեմայով քննարկմանն ասաց «5-րդ ալիք» ՀԸ գործադիր տնօրեն Հարություն Հարությունյանը։ Նրա խոսքով՝ Չինաստանում լրագրող չեն ունեցել և օգտվել են վարչապետի ֆեյսբուքյան էջից, ինչը դիտարկվել է որպես հակաքարոզչություն։

«Չստանալով վարչապետի աշխատակազմից բավարար լրատվություն, մեղադրում են, եթե իրենց քիմքին հաճելի չի»,- նշեց Հարությունյանը՝ հավելելով, որ լրատվամիջոցի դեմ արշավը սկսվել է այն պահից, երբ ՀԸ-ն եթեր դուրս եկավ որպես «5-րդ ալիք»։

Հարությունյանը նաև հայտնեց, որ իշխանության շատ ներկայացուցիչների արգելված է գալ «5-րդ ալիք», մասնակցել բանավեճերի, հարցազրույցների։

«Սքրիններ ունենք, ասում են՝ «Գիտեք մենք ձեր մոտ շատ ենք ուզում գալ, բայց մեր գլխին պատմություն կդառնա… քանի որ մարտի 1-ի մասին ֆիլմ եք ցույց տվել, չենք կարող գալ, թող մի քիչ ժամանակ անցնի, հետո կորոշենք»: Այսինքն՝ մարդիկ ուզում են մեզ մոտ գալ, բայց իրենց արգելված է մեզ մոտ գալ, մարդիկ խիստ հրահանգավարված են, որ չգան, բանավեճերի, հարցազրույցների չմասնակցեն: Սա այսօր ազատ խոսքի, մամուլի ազատության մասին բարձրաձայնող իշխանությունների որդեգրած քաղաքականությունն է»,- ասաց Հարությունյանը։

Վերջինս ընդգծեց, որ այսօրվա իշխանություններն ամենաշատը սարսափում են ճշմարտությունից և իրենց համար ավելի հեշտ է ստեղծել ֆեյքերի խմբավորումներ, որոնք կհարձակվեն և տվյալ լրագրողի, լրատվամիջոցի հասցեին կգրեն ինչ-որ ուզեն, քան ՝ իրենք հարցազրույց տան։

Աղբյուր` Փաստինֆո