Փաստ ինֆո

Իրականությանը չի համապատասխանում ՀՔԾ-ի այն դիտարկումը, թե ՍԴ նախկին նախագահը հրաժարականի դիմում է ներկայացրել ոչ թե մարտի 1-ին, այլ՝ 5-ին։ Այս մասին այսօր տեղի ունեցած ասուլիսին ասել է իրավապաշտպան, ԱԺ աշխատակազմի ղեկավարի նախկին տեղակալ Արսեն Բաբայանը։

Նրա խոսքով՝ այդ միտքը զարգացնելու համար ՀՔԾ-ն փորձեց ներկայացնել, թե հրաժարականի դիմումն ԱԺ մուտքագրվել է մարտի 5-ին, ընդ որում՝ որևէ ապացույց գոյություն չունի, որ այդ փաստաթուղթը ԱԺ մուտք է եղել մարտի 5-ին, այլ հակառակը՝ կան ապացույցներ, որ մուտք է եղել մարտի 2-ին։

Ըստ Բաբայանի՝ փորձում են ցույց տալ, թե մարտի 5-ին մուտքագրվելու դեպքում կգործեր ոչ թե 2016թ. «ԱԺ կանոնակարգ» օրենքը, այլ՝ 2002թ օրենքը։

«Մինչդեռ՝ քրեական գործում եղած փաստերը հաստատում են, որ նրանք, ովքեր պետք է որոշեին, թե որ օրենքը պետք է կիրառեն, ի սկզբանե՝ կիրառել են 2016թ.-ի օրենքը։ Հետևաբար՝ ժամկետների հետ կապված որևէ խնդիր չի կարող առաջանալ, գոյություն չունի»,- ասաց Բաբայանը։

Ինչ վերաբերում է իշխանության յուրացմանը՝ Բաբայանն ասաց. «ՀՔԾ-ն կարծում է, որ, եթե այսպիսի դեպք է տեղի ունեցել, իսկ մենք արդեն հասկացանք, որ այդպիսի դեպք տեղի չի ունեցել, ապա այդպիսով՝ մի խումբ անձինք, այդ թվում՝ ես, յուրացրել են ՍԴ լիազորությունը՝ ՍԴ նախագահ ընտրելու։ ՍԴ-ն այդպիսի լիազորություն չունի, որովհետև ՍԴ լիազորությունները սահմանված են Սահմանադրությամբ, դրանք սպառիչ են։ Խոսքը գնում է ՍԴ ձևավորման մասին» ։

Ըստ Բաբայանի՝ իրավաբանությունը ՀՀ-ում դարձել է հիբրիդային գիտություն և նույնիսկ մասնագիտական այդ պարզամիտ հարցերում նրանք սխալներ են թույլ տալիս և իր ներկայացրածի հետ համաձայն է նաև Դատախազությունը։

«Երեկ տեղեկացա, որ քննիչն առարկություն է ներկայացրել Դատախազություն՝ կապված իշխանության յուրացման մեղադրանքի հետ։ Եթե հիշում ենք, Դատախազությունն ասել էր, որ իշխանության յուրացում տեղի չի ունեցել, այսինքն՝ օկուպացիա տեղի չի ունեցել, առավելագույնը՝ գնացեք քննեք տեսեք իշխանության չարաշահում տեղի ունեցել է, թե ոչ։ Իսկ պաշտոնեական կեղծիքը ևս չեն կարողացել հաստատել։ Այս առնչությամբ ՀՔԾ-ն առարկություններ է ներկայացրել Դատախազություն»,- նշեց Բաբայանը՝ հավելելով, որ առաջին անգամ, երբ դատախազությունը չէր հաստատել մեղադրանքը, նույն գործընթացն էր տեղի ունեցել։

Նրա խոսքով՝ Դատախազությունն իր գործողություններում ևս չի փայլում օրինականությամբ և գրագիտությամբ։
«Այս հանգամանքներում ինձ հետ կապված քրեական գործը գոյություն ունենալու իրավունք չունի։ Այս գործը պետք է կարճվեր հենց այն ժամանակ, երբ ուղարկել էին Դատախազություն՝ հաստատելու համար, բայց որոշել են գնալ պասերով խաղերի»,- ասաց Բաբայանըը՝ նշելով, որ այդ պասերով խաղը կշարունակվի այնքան ժամանակ, մինչև վերջնական որոշեն, թե ինչպես պետք է ազատվեն այս գլխացավանքից։ Բաբայանը նշեց, որ, եթե գործը գնա դատարան, ապա մեղադրական կողմում կանգնած ցանկացած իրավաբան ծիծաղելի իրավիճակում կհայտնվի։

Աղբյուր` Փաստինֆո