Փաստ ինֆո

Նարեկ Սամսոնյանի նկատմամբ իրականացվում է քաղաքական հետապնդում։ Այս մասին լրագրողների հետ ճեպազրույցում ասաց «Արմնյուզ FM»-ի ղեկավար Լիլիթ Թումանյանը։

«Որքան դատապարտելի է վերաբերմունքը ԶԼՄ-ների նկատմամբ, այդքան էլ՝ նույն աստիճան օրինաչափ։ Ակնհայտ է, որ բոլոր այն ավտորիտար ռեժիմները, որոնք ձգտում են ուզուրպազնել իշխանությունը, կենտրոնացնել այն սեփական ձեռքում, չեն կարող հանդուրժել ազատ և անկողմնակալ, հետաքննող, իրականությունը վերհանող մամուլ»,- ասաց Թումանյանը՝ ընդգծելով. «հասկանալի է, երբ օրենսդիր, գործադիր, դատական համակարգերը մեկը մյուսի հետևից տապալվում են, երբ որ տապալվում են պետական ինստիտուտները, երբ որ տապալվում են հենքերը պետության, անհնար է, որ հաջորդիվ հարձակում չգնա նաև ԶԼՄ-ների նկատմամբ»։

Նրա խոսքով՝ հանրությունն իրավունք ունի իմանալու ինչ է կատարվում և՛ իշխանության ներսում, և՛ հասարակական կյանքում, և՛ պետության կյանքում։

«Իշխանության նպատակներից մեկն էլ այն է, որ ահաբեկի, զերծ պահի լրագրողական հանրությանն այդպիսի գործունեություն վարելուց՝ մտավախություն ունենալով, որ նման մեղադրանք կարող է ներկայացվել նաև իրենց»,- ասաց Լիլիթ Թումանյանը՝ հավելելով, որ սուտ մատնության հոդվածը երբևէ չի կիրառվել

ՀՀ-ում և կարելի է ասել, որ սա աննախադեպ հետապնդման դրսևորումներից է՝ բացասական տեսանկյունից։

«Վաղը մյուս օրը, երբ Փաշինյանի մտքով կանցնի որևէ տեղ հպարտանալ կամ պարծենալ, որ մենք մամուլի ազատության կետով 8-րդ տեղում ենք, այն ինչ՝ իրականում 61-րդում ենք, մենք ավելի ետ կընկնենք»,- նշեց Թումանյանը՝ հավելելով, որ հարևան ավտորիտար երկրները հետագայում պարզապես կծաղրեն, քանի որ մենք փորձում ենք ներկայանալ այնպես, որ ժողովրդավար երկիր ենք, մինչդեռ՝ գործում ենք հակառակը։

Աղբյուր` Փաստինֆո