Փաստ ինֆո

Իրավագիտությունը վերջնականապես տապալված է մեր երկրում, գուցե դեռ ոչ իրավաբանությունը։ Այս մասին «Սահմանադրական անվտանգություն. Մարտահրավերներ և լուծումներ» խորագրով քննարկմանն ասել է ՍԴ նախագահի խորհրդական Գրիգոր Մուրադյանը։

Նրա խոսքով՝ իրավագիտության մասին ոչ մի խոսք չի կարող գնալ, քանի դեռ այս գործընթացում տեղի չունենա բեկում և շրջադարձ և վերահաստատվի սահմանադրական կարգը և իրավական պետության գոնե տարրական իրավաընկալումը։

Մուրադյանի խոսքով՝ շատերը ՍԴ-ի շուրջ տեղի ունեցող բիրտ ոտնձգությունները կապում են կոնկրետ գործերի հետ, ինչ-ինչ խնդիրների հետ։

«Բայց, իրականում, ծայրահեղ պոպուլիզմն ու Սահմանադրական պետությունը անհամատեղելի են, իսկ ՍԴ-ն, որպես Սահմանադրության բարձրագույն պահապան, պետք է սահմանադրական արժեհամակարգը պահպանի ցանկացած ոտնձգություններից։ Ծայրահեղական պոպուլիզմի հիմքում դրված է քաղաքական սեգրեգացիա, այսինքն՝ բաժանումը տարբեր մասերի, եթե չկա թշնամի, անպայման այդ թշնամին պետք է լինի, հակառակ դեպքում, ծայրահեղական պոպուլիզմի գոյատևման շանսերը հավասարվում են զրոյի», - ասաց Մուրադյանը։

Նրա մոտ տպավորություն է, որ Հայաստանը հետ է շպրտվում ոչ թե անգամ դեպի Խորհրդային Հայաստանի սահմանադրություն, այլ՝ նախորդ դարի 30-ականներ։

«Ինչ վերաբերում է հիմնավորումներին, ես, որպես քաղաքական իշխանության երազանքների Սահմանադրական դատարանի, կներեք անհամեստությանս համար, «ճարտարապետ», որովհետև 7-րդ գլխի հիմնական հեղինակը ես եմ, պետք է ասեմ, որ 7-րդ գլուխը շարադրելիս իմ մտքով չի անցել, որ այն հնարավոր է մեկնաբանել այնպես, որ իրավական պետությունում ՍԴ դատավորի, ցանկացած այլ դատարանի դատավորի անփոփոխելիությունը կարող է լինել չերաշխավորած, քանի որ այդպես է կարծում, իրենց ընկալմամբ, ժողովուրդը, սա ուղղակի աներևակայելի ընկալում կլիներ», - ասաց նա։

Նրա խոսքով՝ խաթարվում են Սահմանադրության կայունությունը։

Աղբյուր` Փաստինֆո