Փաստ ինֆո

Սահմանադրական դատարանի նախագահի խորհրդական Գրիգոր Մուրադյանը բացառում է, որ մինչև հանրաքվե ՍԴ նախագահ Հրայր Թովմասյանը հրաժարական ներկայացնի։

«Սահմանադրական դատարանի նախագահի մասով լիովին բացառում եմ, չեմ ուզում հիմա սա դիտարկվի, գիտեք, շահարկում են այդ հարցը, որ կարող է ճնշում լինել իրենց ազատ կամարտահայտության վրա, հանրաքվեն չի՞ դիտվում ճնշում, երբ հարկադրաբար դադարեցվում են իրենց լիազորությունները», - լրագրողների հետ զրույցում ասաց Գրիգոր Մուրադյանը՝ անդրադառնալով հարցին, թե արդյոք ՍԴ դատավորները կգնան վաղ կենսաթոշակի։
Նա կրկնեց, որ իսպառ բացառում է, Հրայր Թովմասյանը հրաժարականը։

«Բացառում եմ նաև այն դատավորների մասով, ովքեր հայտարարել են, որ դա իրենց համար անհնարին է, օրինակ, Ալվինա Գյուլումյանը, Արևիկ Պետրոսյանը, մնացյալի մասով իրենք պետք է որոշեն՝ ինչ ճանապարհ են ընտրում։ Չէի ցանկանա ներազդել իրենց ազատ կամարտահայտության վրա», - ասաց Գրիգոր Մուրադյանը։

Նա չբացառեց ՍԴ դատավորների կողմից ՄԻԵԴ դիմելու հնարավորությունը, եթե վերջիններիս լիազորությունները կասեցվեն։ Նա ասաց, որ այլընտրանքային լուծումներ էլ կան, որոնց մասին չի ցանկանում բարձրաձայնել։

Մուրադյանը չբացառեց, որ հաշվի առնելով խախտումների էությունը, դրանց կոպիտ բնույթն ու առանձնակի ցինիզմը, հնարավոր է, որ ՄԻԵԴ-ը նաեւ ՍԴ դատավորներին պաշտոններին վերականգնելու որոշում կայացնեն, եթե լինի այդպիսի պահանջ։

Անդրադառնալով սպասվող սահմանադրական հանրաքվեն վիճարկելու ընթացակարգի մասին հարցին, Գրիգոր Մուրադյանը նաեւ ասաց, որ ԱԺ խմբակցությունները հանրաքվեից հետո հնարավորություն ունեն դիմել ՍԴ, եթե հանրաքվեի կազմակերպման ու իրականացման արդյունքում լինեն Սահմանադրության եւ օրենքների այնպիսի խախտումներ, որոնք ազդած կլինեն հանրաքվեի արդյունքների վրա։

Նրա խոսքով, բոլորը գիտեն, թե ինչ խախտումներ են տեղի ունեցել ՝ սկսած ԱԺ կանոնակարգ սահմանադրական օրենքից, մինչեւ Սահմանադրության անփոփոխելի հոդվածների էության հետ կապված խնդիրները։

Անդրադառնալով ԱԺ նախագահի՝ ՍԴ դատավորների հետ հանդիպելու մասին լուերին, Գրիգոր Մուրադյանն ասաց, որ ՍԴ-ի ներսում նման տեղեկություն չկա, որ ԱԺ նախագահը հանդիպումներ է ունենում ՍԴ դատավորների հետ։

«Սակայն, եթե չեմ սխալվում, մամուլում հրապարակվեց, որ ԱԺ աշխատակազմը հաստատել է հանդիպումների փաստը։ Ի՞նչ են իրենք քննարկում, ես չգիտեմ, բայց եթե պայմանական քաղաքական իշխանությունը ինչ-որ սակարկություններ է անելու, պետք է ևս մեկ անգամ զգուշացնել, որ սա շատ լուրջ խնդիր է դառնալու իրենց համար հետագայում», - հավելեց նա։

Աղբյուր` Փաստինֆո