Փաստ ինֆո

Խորհրդարանում քննարկվում է ԱԺ «Իմ քայլը» խմբակցության պատգամավորներ Նիկոլայ Բաղդասարյանի, Սոնա Ղազարյանի ներկայացրած «ՀՀ քրեական դատավարության օրենսգրքում» լրացումներ և փոփոխություններ կատարելու մասին ՀՀ օրենքի նախագիծը։

Նախագծով առաջարկվում է բարձրացնել անչափահասների իրավունքների պաշտպանվածության մակարդակը քրեական վարույթում և քրեական արդարադատության շրջանակում։

«Երեխաները բոլոր ժամանակներում և հասարակարգերում մշտապես հանդիսացել են հասարակության ամենաանպաշտպան և խոցելի խավը։ Ներկայումս քրեական դատավարության օրենսգրքում առկա կարգավորումներն ամբողջությամբ չեն բխում երեխայի լավագույն շահերից, և մենք առաջարկում ենք դրանք համապատասխանեցնել միջազգային չափանիշներին։ Չնայած այժմ նախատեսված է անչափահասների հարցաքննության կարճ տևողություն, օրինական ներկայացուցիչների և մանկավարժների մասնակցությունը և որոշ այլ առանձնահատկություններ, սակայն ակնհայտ է, որ առկա կարգավորումների միջոցով օբյեկտիվորեն հնարավոր չէ ապահովել երեխաների իրավունքների պաշտպանության այն մակարդակը, որը մաքսիմալ կերպով հնարավորություն կսահմանի բացառելու հետագա անցանկալի հետևանքները։ Առաջարկում ենք օրենքներում փոփոխություններ կատարելու միջոցով անչափահասների իրավունքների պաշտպանվածությունը հասցնել առավելագույն շեմի՝ սահմանելով լրացուցիչ երաշխիքներ»,-նշեց Նիկոլայ Բաղդասարյանը։

Նախագծով առաջարկվում է հարցաքննության մասնակից դարձնել հոգեբանին, միաժամանակ վերջինիս իրավունք տալով անմիջականորեն անչափահասներին հարցեր տալ, որոնք պարտադիր պետք է արտացոլվեն քննչական գործողության արձանագրության մեջ նշումով, որ տվյալ հարցը տրվել է հոգեբանի կողմից։

Նախագծով առաջարկվում է փոփոխություն կատարել դատարանում անչափահասի հարցաքննության ընթացակարգում, պայմանով, որ եթե մինչդատական վարույթում անչափահասի հարցաքննության ժամանակ կիրառվել է տեսանկարահանում, ապա սկզբից հրապարակվում է տեսանկարահանումը, իսկ կողմի միջնորդության դեպքում միայն անչափահասը հրավիրվում է դատարան։

Նախագծով առաջարկվում է նաև քննիչին իրավունք վերապահել անչափահասների հարցաքննության վայրն ընտրել՝ հաշվի առնելով անչափահասի լավագույն շահը։

Աղբյուր` Փաստինֆո