Փաստ ինֆո

«Ավելի պարզ ասեմ՝ տեսնելով, որ քաղաքական ուժերը որոշակի քաղաքական նկատառումներից ելնելով չեն պատրաստվում «Ոչ»-ի կողմը վերցնել, համարեցի, որ պետք է այնուամենայնիվ, «Ոչ»-ի կողմն էլ լինի իրավական պաշտպանության տակ եւ ելնելով հայտարարության մեջ նշված հիմքերից, միացա նախաձեռնությանը»,- «Փաստինֆո»-ի հետ զրույցում ասաց Ազգային հակակոռուպցիոն խորհրդի անդամ, իրավապաշտպան Արսեն Բաբայանը, որը միացել է «Իրավական ուղի» ՀԿ համահիմնադիր Ռուբեն Մելիքյանի նախաձեռնությանը՝ ստեղծել «ՈՉ»-ի քարոզչական կողմ քաղաքացիական նախաձեռնության միջոցով։

Արսեն Բաբայանն ասաց, որ այսկերպ իրենք ստանձնում են «Ոչ»-ի հանրային պաշտպանությունը։

Դիտարկմանը, թե տեսակետ կա, որ «Ոչ»-ի քարոզչական շտաբն անուղղակիորեն կլեգիտիմացնի իրավական տեսանկյունից խիստ խոցելի եւ մասնագիտական շրջանակների կողմից հակասահմանադրական որակված հանրաքվեի գործընթացը, Արսեն Բաբայանն ասաց, որ շատ են խոսել այն մասին, որ սպասվող հանրաքվեն ոչ լեգիտիմ է, որովհետեւ խախտված են սահմանադրական ու օրենսդրական բազմաթիվ նորմեր, բայց այդուհանդերձ, փաստն այն է, որ հանրաքվեն նշանակվել է, ինչը նաեւ նախաձեռնող խմբի հայտարարության մեջ է շեշտվում։

«Ուզենք, թե ոչ, պետք է հաշվի նստենք այն հանգամանքի հետ, որ հանրաքվեն տեղի է ունենալու եւ, ելնելով պետության շահերից, որոշեցինք ստանձնել հանրային պաշտպանությունը «Այո»-ից տարբերվող կարծիք ունեցողների համար՝ միաժամանակ, նկատի ունենալով այս գործընթացի միջազգային արձագանքները, որպեսզի ժողովրդական լեզվով ասած, անտեր չթողնենք «Ոչ»-ի կողմը»,-ասաց Արսեն Բաբայանը։

Իրավապաշտպանն ասաց, որ այս նախաձեռնության մեջ քարոզչությունը երկրորդ պլան է մղվելու, ինչով հնարավորություն են տալու «Այո»-ից տարբերվող ուժերին ու մարդկանց արտահայտել իրենց կարծիքը, միեւնույն ժամանակ, ապահովելու են սպասվող գործընթացների օրինականությունը, վերահսկողությունը եւ հետագայում՝ հնարավոր բողոքարկելիությունը։

Նշենք, որ «Իրավական ուղի» ՀԿ համահիմնադիր Ռուբեն Մելիքյանը այսօր հայտարարություն էր տարածել, որով տեղեկացնում էր, որ ելնելով ժողովրդավարության ու իրավունքի գերակայության արժեքները պաշտպանելու հրամայականից՝ իրավաբանական համայնքի շրջանակում սկսում են խորհրդակցություններ՝ օրենքով սահմանված կարգով «ՈՉ» քարոզչական կողմ քաղաքացիական նախաձեռնությամբ ձևավորելու օրակարգով։

Հայտարարության մեջ շեշտվում էր, որ 100-ից ավելի իրավաբաններ և իրավապաշտպաններ օրեր առաջ հրապարակավ դիրքորոշում էինք հայտնել, որ քաղաքական իշխանության նախաձեռնած հանրաքվեն հակասահմանադրական է՝ թե՛ բովանդակային և թե՛ ընթացակարգային առումներով, բայց, այնուամենայնիվ, հանրաքվեն «դե ֆակտո» իրողություն է դառնում։

Հավելենք նաեւ, որ խորհրդարանական ուժերը, ըստ էության չեն ձեւավորում «Ոչ»-ի քարոզչական շտաբը։

Ինչպես ավելի վաղ «Փաստինֆո»-ն տեղեկացրել է, նախագահ Արմեն Սարգսյանը անսալով իրավական հանրույթի՝ իրեն ուղղված կոչը, այդուհանդերձ ստորագրեց հանրաքվե նշանակելու մասին հրամանագիրը, եւ, փաստորեն, ապրիլի 5-ին հանրաքվեի կդրվի ՍԴ դատավորների «ճակատագիրը» ։

ԱԺ իշխող «Իմ քայլը» խմբակցության ներկայացրած նախագծով առաջարկվում է հանրաքվեի դնել ՍԴ 9 դատավորներից 7 –ի ՝ ներառյալ ՍԴ նախագահ Հրայր Թովմասյանի լիազորությունները դադարեցնելու մասին հարցը։

Այսինքն, նախագիծը չի վերաբերվելու իշխանափոխությունից հետո ընտրված 2 դատավորներին՝ Արման Դիլանյանին և Վահե Գրիգորյանին։

Տեղեկացնենք, որ «Հանրաքվեի մասին» ՀՀ սահմանադրական օրենքի համաձայն՝ «Ոչ» քարոզչական շտաբ նախաձեռնելու համար կարող է դիմել և գրանցվել նախագծին դեմ քվեարկած պատգամավորը կամ պատգամավորները՝ 7-օրյա ժամկետում։ Հարցի քննարկմանը նվիրված ԱԺ արտահերթ նիստին խորհրդարանական 2 ընդդիմադիր խմբակցություններից միայն «Լուսավոր Հայաստան»-ը «դեմ» քվեարկեց, իսկ ԲՀԿ-ն բչմասնակցեց քվեարկությանը։ Այնուհետեւ «Լուսավոր Հայաստանը» հայտարարեց հանրաքվեի քարոզչությանը չմասնակցելու մասին։

Օրենքը նախատեսում է, որ 7-օրյա ժամկետը լրանալուց հետո եռօրյա ժամկետում 50 հոգանոց քաղաքացիների խումբը կարող է գրանցվել որպես «Ոչ» քարոզչական նախաձեռնություն։

Եթե այս նախաձեռնությունն էլ չձեւավորվի, օրենքը հնարավորություն է տալիս հանրաքվեի քարոզչությունը իրականացնել միայն «Այո»-ի շտաբին։

Աղբյուր` Փաստինֆո