Փաստ ինֆո

«Սասնա ծռերի» գործի անջատված մասով առաջինն ազատության մեջ հայտնված մեղադրյալ Էդգար Սողոմոնյանն այսօր ներկայացել է հարցաքննության «Սասնա Ծռեր -1» գործով, բայց այս անգամ վկայի կարգավիճակով։ Նշենք, որ վերջինս ազատ է արձակվել համաներմամբ, քրեական հետապնդումն էլ դադարեցվել։

Դատարանն արձանագրեց, որ անձն, ով նույն գործով նախկինում ներգրավված է եղել որպես մեղադրյալ, չի կարող հարցաքննվել որպես վկա։ Նախագահող դատավորը նշեց, որ ողջամտորեն անձի ցուցմունքը կարող է օգտագործվել իր դեմ։

Ամբաստանյալ Պավել Մանուկյանը պնդեց, որ Էդգար Սողոմոնյանը նախաքննության ընթացքում կեղծ ցուցմունք է տվել, իսկ ամբաստանյալ Արմեն Բիլյանը հայտարարեց, որ կեղծ վերջինս կեղծ ցուցմունք է տվել և նույն օրը՝ 10.000 ՀՀ դրամ վերցնելով գնացել է տուն։

Պաշտպան Եգորյանը հարցրեց, թե արդյո՞ք իրեն զգուշացրել են, որ ինքը չխոսի դատարանում. Սողոմոնյանը կրկին հրաժարվեց պատասխանելուց։ Հարցին, թե արդյոք ինքը մինչեւ դատական նիստին ներկայանալը, հանդիպե՞լ է գործով քննիչներին՝ վկան կրկին հրաժարվեց։ Վերջինս չպատասխանեց նաև հարցին, թե արդյո՞ք քննիչը զգուշացրել է իրեն, որ հարցերին պատասխանելու դեպքում խափանման միջոցը կփոխվի։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։

ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:
Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո