Փաստ ինֆո

ՀՀ նախկին գլխավոր դատախազ Գևորգ Կոստանյանի պաշտպանները դատական կարգով բողոքարկել են ՀՔԾ որոշումը, որով քննիչը մերժել էր տրամադրել Կոստանյանին առաջադրված մեղադրանքի հիմքում դրված ապացույցները։ Այս մասին «Փաստինֆո»-ին հայտնեց Գևորգ Կոստանյանի պաշտպանական խմբի անդամ Գևորգ Գևորգյանը։

Նրա խոսքով՝ ՀՔԾ-ն պարտավոր է տրամադրել նյութերը։

«Գործող իրավական ակտերի և Սահմանադրության համաձայն՝ պարտավոր են տրամադրել։ Պատկերացրեք՝ եթե յուրաքանչյուր անձ մեղադրվի որևէ արարքի մեջ և տեղեկություն չունենա, թե ինչ ձևով, ինչ ապացույցներով է իրեն մեղադրանք առաջադրվել, ինչպե՞ս կարող է արդյունավետ պաշտպանվել։ Դա ոչ միայն բխում է Մարդու իրավունքների եվրոպական կոնվենցիայից, այլև՝ Սահմանադրության համապատասխան հոդվածը սահմանում է, որ յուրաքանչյուր անձ, ով մեղադրվում է ինչ- որ արարքի կատարման մեջ, իրավունք ունի ծանոթանալ այն հիմքերին և ապացույցներին, որոնք դրված են մեղադրանքի որոշման մեջ»,- ասաց պաշտպանը։

Հիշեցնենք, որ Գևորգ Կոստանյանին «Մարտի 1»-ի գործով որպես մեղադրյալ ներգրավելու մասին ՀՔԾ-ն հայտարարել է նոյեմբերի 25-ին, սակայն միայն 10 օր անց՝ դեկտեմբերի 5-ին, հայտարարվեց նրան մեղսագրվող հոդվածները։ Ըստ այդմ՝ նա մեղադրվում է ՀՀ քրեական օրենսգրքի 5 հոդվածով՝ 314-րդ հոդվածի 1-ին մասով, 38-308-րդ հոդվածի 2-րդ մասով, 38-314-րդ հոդվածի 1-ին մասով, 38-334-րդ հոդվածի 1-ին մասով և 38-349-րդ հոդվածի 3-րդ մասի 1-ին կետով, այսինքն՝ պաշտոնեական կեղծիք կատարելու, ծանր հետևանք առաջացնող պաշտոնեական լիազորությունների չարաշահման օժանդակման, պաշտոնեական կեղծիքի օժանդակման, ծանր կամ առանձնապես ծանր հանցագործության պարտակելը օժանդակելու և ծանր կամ առանձնապես ծանր հանցագործությունների վերաբերյալ գործերով ապացույցների կեղծմանը օժանդակելու համար ։

Գ.Կոստանյանի նկատմամբ հետախուզում հայտարարվելու մասին ՀՔԾ-ն հայտնեց 2019թ. նոյեմբերի 28-ին և քննիչը նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրեց դատարան, ինչը բավարարվել է 2019թ. դեկտեմբերի 4-ին։

Գևորգ Կոստանյանի փաստաբանները վերաքննիչ բողոք են ներկայացրել՝ պահանջելով բեկանել Գևորգ Կոստանյանի նկատմամբ կալանավորումը որպես խափանման միջոց ընտրելու մասին Առաջին ատյանի դատարանի որոշումը, ինչի դեմ փաստաբանների ներկայացրած վերաքննիչ բողոքը Վերաքննիչ քրեական դատարանը՝ դատավոր Կարեն Մարդանյանի նախագահությամբ, 2019թ. դեկտեմբերի 30-ին մերժել է։ Պաշտպանները բողոքարկել են նաև Վերաքննիչ քրեական դատարանի որոշումը։

Հեղինակ՝ Իզաբել Սահակյան

Աղբյուր` Փաստինֆո