Փաստ ինֆո

Այսօր ԱԺ-Կառավարություն հարց ու պատասխանի ժամանակ ԱԺ «Իմ քայլը» խմբակցության պատգամավոր Սիսակ Գաբրիելյանն անդրադարձավ վարչապետ Նիկոլ Փաշինյանի՝ նախորդ շաբաթ հնչեցրած հայտարարությանը, թե «Բոլոր այն մարդիկ, ուժերը, ովքեր կփորձեն իրավական կամ այլ ճանապարհով խոչընդոտ հարուցել ժողովրդի ազատ կամարտահայտմանը, նրանք կարժանանան ուժեղ հակահարվածի՝ որպես հակաժողովրդական ու հակապետական ուժեր, իսկ նրանք, ովքեր կընդունեն ժողովրդի բարձրագույն իրավունքը կդասվեն ժողովրդի ապագան կերտող նվիրյալներ»։ Պատգամավորը հետաքրքրվեց, թե Փաշինյանն այս խոսքերն ասելով ում նկատի ուներ և արդյոք պատրաստվում է վառել այդ մարդկանց մեքենաները։

«Եթե մենք մեքենա վառող լինեինք, մեզ հետ այդպես չէին խոսի, որովհետև եղել են ժամանակներ, եղել են մեքենա վառողներ, պադեզդներում ծեծողներ, ընդհուպ կրակող ու սպանողներ, և այդ նույն մարդիկ՝ այդ մարդկանց հետ երբեք այդ տոնով չեն խոսել, որովհետև իսկապես մտածել են, որ գուցե դրան հաջորդի մեքենայի վառելը, շքամուտքում ծեծելը, որոշ դեպքերում նաև ավելի համոզիչ մեթոդներ: Եվ ես ուրախ եմ, որ այսօր մեր կառավարության պայմաններում այդպիսի քննարկումներ տեղի են ունենում, այդպիսի տոնայնությամբ խոսակցություններ կառավարության ու վարչապետի հասցեին տեղի են ունենում, որովհետև այն ժամանակ, երբ ես այդ թեմայով խոսում էի, նաև այսօրվա մի շարք ընդդիմադիր գործընկերներ ուղղակի սփրթնում էին ԱԺ դահլիճում:

Ես ուրախ եմ, որ նրանք վերագտել են կամ գտել են իրենց վստահությունը»,- ասաց Փաշինյանը:

Նա նշեց, որ ինքն ասել է, ով կխոչընդոտի ժողովրդի ազատ կամքի արտահայտմանը, կհամարվի հակապետական ուժ:

«Ինձ թվացել է, որ մենք՝ ընդհանրապես բոլորի ժամանակների ընդդիմադիրներս, այդպես ենք վերաբերվել, որ ով ժողովրդի ազատ կամքի արտահայտմանը դեմ կգնա… Մեր երազանքը ժողովրդի ազատ կամքի արտահայտումը չի եղե՞լ, այդ թվում՝ մեր համատեղ գործունեության ընթացում: Իհարկե, դա է եղել:

Կարևոր նրբություն կա, ասել եմ՝ իրավական խոչընդոտ: Ի՞նչ եմ ակնարկել, ակնարկել եմ, որ եթե այս որոշումը ՍԴ-ում վիճարկվի, մենք դա կգնահատենք այդպես: Ինչո՞ւ, որովհետև մենք ասում ենք՝ եկեք գնանք ժողովրդին հարցնենք և արտահայտենք ժողովրդի ազատ կամարտահայտությունը: Եթե ուժ կա, ասում է՝ չէ, ես ժողովրդին չեմ հարցնում, ես պիտի հարցնեմ ՍԴ-ին, այս իրավիճակում բխում է որոշակի հետևություն»,- շեշտեց վարչապետը:

Ըստ Փաշինյանի՝ ՀՀ պատմության մեջ երբեք չի եղել քվեարկություն, երբ եթերում եղել է 5 ընդդիմադիր հեռուստաընկերություն. «ՀՀ պատմության մեջ երբեք քվեարկություն չի եղել մի պայմաններում, երբ Հայաստանը մամուլի ազատության չափանիշով աշխարհում 8-րդ տեղը կիսում է Ֆրանսիայի հետ: Այդ ինչի՞ մասին են խոսում, ո՞ւմ բերանն ենք մենք փակում, ո՞ւմ մեքենան ենք մենք վառում»։

Մանրամասները՝ տեսանյութում։

Աղբյուր` Փաստինֆո