Փաստ ինֆո

Երևանի ընդհանուր իրավասության դատարանում՝ դատավոր Մեսրոպ Մակյանի նախագահությամբ, սկսվել է «Սասնա ծռեր 1» գործով դատական նիստը։ «Փաստինֆո»-ի հաղորդմամբ՝ այս դատական նիստին ներկայացել են դատակոչված վկաները՝ բժիշկները, որոնք վիրահատել են ՊՊԾ գնդի գրավման հետևանքով զոհված ավագ ենթասպա Գագիկ Մկրտչյանին։

Բացի այդ՝ դատարանը նաև ստացել է Գագիկ Մկրտչյանի հիվանդության պատմագրերը։

Գործով նախագահողը հայտնեց, որ «Աստղիկ» ԲԿ-ում լրացված պատմագրով բոլոր տեղերում նշված է, որ հիվանդը գտնվում է ծայրահեղ ծանր վիճակում, գիտակցությունը մթագնած է և այլն։

Ինչ վերաբերում է Երևանի Հերացու անվան պետական բժշկական համալսարանին կից համալսարանական հիվանդանոցում լրացված պատմագրին, ապա 23.07.2016թ. պատմագրում առկա է հետևյալ գրառումը՝ գանգատվում է աջ դաստակի շրջանում ակտիվ շարժումների սահմանափակումից, դժվարանում է դաստակի շարժումը դեպի վերև։

«Այնուհետև նշված է՝ գիտակցությունը պահպանված, հարցերին պատասխանում է ճիշտ, շուտ հոգնում է, հրահանգները կատարում է, մենինգյալ նշաններ չկան, շարժումները պահպանված են»,- ասաց նախագահող դատավորը։ Պատմագրում նշված հաջորդ՝ 24.07.16թ.-ի գրառմամբ նշված էր, որ հիվանդի վիճակը ծայրահեղ ծանր է՝ պայմանավորված վնասվածքով, վիրահատական միջամտությամբ, հարցերին պատասխանում է ուշացումով և դժվարությամբ։ Նույն օրը նաև արձանագրվել է, որ Գագիկ Մկրտչյանի վիճակը ծանր է և նկատվում է բացասական դինամիկա։ Հաջորդ օրը՝ Մկրտչյանը գտնվում էր երկարատև թոքերի արհեստական շնչառության պայմաններում և պատասխանում էր հարցերին միայն միմիկայով։

Ավելի վաղ տեղեկացրել ենք, որ նախորդ դատական նիստին դատարանը բավարարել էր ամբաստանյալներ Պավել Մանուկյանի և Արմեն Բիլյանի պաշտպան Զարուհի Փոստանջյանի միջնորդությունը, որով վերջինս խնդրել էր գործով տուժող Գագիկ Մկրտչյանի հիվանդության պատմագիրը վերցնել բուժհաստատությունից կամ ՀՔԾ-ից։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:
Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո