Փաստ ինֆո

«Այսօր մանրամասն զրույց ենք ունեցել եւ պաշտպանության նախարարի եւ ԶՈՒ ԳՇ պետի հետ։ Ցանկացած դեպք մեծ խնդիր է մեզ համար, բոլորիս համար, առաջին հերթին պաշտպանության նախարարի եւ ԶՈՒ ԳՇ պետի համար։ Խնդրի խորքը հասկանալու համար պետք է գնանք եւ տեսնենք մեր բակերում, դպրոցներում երեխաները ինչպես են իրար հետ շփվում»,-այսօր կառավարություն-ԱԺ հարցուպատասխանի ժամին հայտարարեց ՀՀ վարչապետ Նիկոլ Փաշինյանը՝ անդրադառնալով բանակում վերջին շրջանում իրար հաջորդող մահվան դեպքերին, որոնք արձանագրվում են խաղաղ պայմաններում։

Վարչապետին հարցն ուղղեց անկախ պատգամավոր Արման Բաբաջանյանը՝ նշելով, որ 43 օրում ոչ մարտական 10 զոհ ենք ունեցել, իսկ վերջին 13 օրում ՝ 7 զոհ։ Հավելենք, որ այսօր հայտնի դարձավ խաղաղ պայմաններում եւս 2 զինվորի մահվան մասին ։
Պատգամավորը նաեւ անհասկանալի համարեց ռազմական ոստիկանության պետին գեներալ մայորի կոչում շնորհելը՝ ակնկալիքով , որ վարչապետը կներկայացնի, թե ինչի համար է նա այդ կոչմանն արժանացել։

Շարունակելով, Նիկոլ Փաշինյանն ասաց, որ իրեն զարմացել է, որ ընդհուպ ԱԺ պատգամավորներ ասել են, թե գողական բարքերը մեր ազգային ինքնության համար կարեւոր են։

«Այսօր մենք բանակում ի՞նչ խնդիր ունենք, վարտիքի փոխելու խնդիր ենք չէ՞ դրել, դրանից հետո լվացքի մեքենաներով ապահովվեցին, հետո պարզվեց , որ մեր զինվորների համար արժանապատվության պրոբլեմ է, որ իր վարտիքը լվացքի մեքենայի մեջ հայտնվի ուրիշի վարտիքի հետ»։ Ըստ Փաշինյանի, այդ հանգամանքը կարող է մեծ պարզաբանման խնդիր ստեղծել։

«Իմ համոզմունքն այն է, որ սա քրեական ենթամշակույթի արտահայտաձեւերից է, ես կասկած չունեմ»,-ասաց նա՝ հավելելով, թե ՔԿՀ-ում տեսել է, թե ոնց են մարդկանց ինչ –որ հասկացությունների հիման վրա հավասարեցնում հողին։

Փաշինյանը Ռազմական ոստիկանության պետին զինվորական կոչում շնորհելու հարցն անպատասխան թողեց։

Աղբյուր` Փաստինֆո