Փաստ ինֆո

Մինչև մեր կուսակցության ղեկավարը մեր կարծիքը չի լսում, իր կարծիքը չի հայտնում։ Լրագրողների հետ զրույցում այս մասին ասաց «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով սահմանադրական փոփոխությունների հանրաքվեին։

«Սահմանադրական փոփոխությունների հանրաքվեի հարցը չի կարող մեկ-երկու հոգու որոշելիք լինել։ Դրա համար մենք որոշել ենք հրավիրել քաղաքական խորհրդի նիստ, որտեղ խնդրի վերաբերյալ հնարավորություն կունենան արտահայտվել ոչ միայն մեր խմբակցության պատգամավորները, այլև մեր կուսակցության անդամները։ Պետք է բոլորի կարծիքը լսել և նոր որոշում կայացնել»,-ասաց Գևորգ Պետրոսյանը։

Նա հավելեց՝ ինքը դեմ է արտահայտվել և իրավական առումով ինչ ասել է, հիմա էլ մնում է այդ նույն կարծիքին, որ այդ գործընթացը սկսվել և ընթանում է ՀՀ գործող օրենսդրության մի շարք խախտումներով. «Ես միշտ էլ ունեցել եմ իմ անձնական կարծիքը։ Բնական է՝ ես խմբակցության անդամ եմ և խմբակցության որոշումներն ինձ համար պարտադիր են, բայց սա այն հարցը չէ, որ խմբակցությունը որոշի։ Պատահական չէ, որ ասում ենք քաղխորհրդի նիստ ենք հրավիրում, որովհետև սա այն հարցն է, որ ոչ թե միայն պատգամավորները պետք է որոշեն, այլ կուսակցական ավելի ընդարձակ կազմ պետք է մսնակցի, որովհետև ի վերջո սրանով պատմություն է կերտվում։ Մենք առավել քան լրջությամբ ենք մոտենում այս գործին»,-նշեց Գևորգ Պետրոսյանը։

Վերջինս ընդգծեց՝ իր անձնական կարծիքը չէ, որ ուղեցույց է հանդիսանալու։ Երկու-երեք օր անց կլինի կուսակցության քաղխորհրդի նիստ, որի ժամանակ էլ կլինի որոշումը։

Պատգամավորը նաև նկատեց՝ պաշտոնապես քարոզարշավը չմեկնարկած արդեն սկսել են «այո»-ի քարոզը. «Հանուն արդարության պետք է ասեմ, որ խոսքը չի վերաբերում միայն «այո»-ի կողմնակիցներին։ Քարոզչություն է սկսվել նաև «ոչ»-ի կողմնակիցների կողմից։ «Ոչ»-ի շտաբ չձևավորելը չի նշանակում, որ մենք «այո» ենք ասում»,-նշեց պատգամավորը։

Գևորգ Պետրոսյանը նաև հերքեց լուրերն այն մասին, որ ԲՀԿ-ն իշխանությունների հետ համաձայնության է եկել հանրաքվեի մասով, իսկ հարցը քննարկելու նպատակով ԲՀԿ առաջնորդը հանդիպել է Փաշինյանի հետ։ Պատգամավորը հիշեցրեց՝ Գագիկ Ծառուկյանն ինքն անդրադարձավ այս հարցին և հերքեց այդ լուրը։

Աղբյուր` Փաստինֆո