Փաստ ինֆո

«Մարդկային զարգացման միջազգային կենտրոն» ՀԿ նախագահ, ԱԺ պաշտպանության եւ ազգային անվտանգության մշտական հանձնաժողովի նախկին անդամ Թեւան Պողոսյանը կարծում է, որ ոստիկանության համակարգում իրականացվող բարեփոխումների նպատակը պետք է լինի քաղաքացուն իրապես որակյալ ծառայությունների մատուցումը։

«Փաստինֆո»-ի հետ զրույցում անդրադառնալով ոստիկանության բարեփոխումների ռազմավարությանը, որը հրապարակվել է իրավական ակտերի նախագծերի հրապարակման միասնական կայքում, Թեւան Պողոսյանն ասաց. «Դրա համար պետք է աշխատել, որովհետեւ բացի թղթի վրա գրելուց, որ այս ենք ուզում, այն ենք ուզում, պետք է նկարագրել նաեւ, թե ոնց են կյանքի այդ ամենը։ Ճանապարհը եւս կարեւոր է լինելու՝ ոնց ենք մենք այդ բարփոխումն անցնելու, արդյո՞ք ունենալու ենք միայն արտաքին փոփոխություն՝ շորի գույներն այսպես փոխենք, բաժնի անվանումն այնպես փոխենք, թե՞ ունենալու ենք իսկապես որակյալ ներքին ծառայություն»։

Հիշեցնենք, բարեփոխումների անհրաժեշտությունն արդարադատության նախարարությունը պայմանավորում է ժողովրդավարական պետությանն ու հասարակությանը բնորոշ ոստիկանության ծառայություն ունենալու անհրաժեշտությամբ: Նախատեսվում է ստեղծել Ներքին գործերի նախարարություն, կատարել այլ կառուցվածքային փոփոխություններ։ Առաջարկվում է օրենքով Ոստիկանության զորքերը նախատեսել որպես ոստիկանական ստորաբաժանում, որի կազմակերպման և գործունեության կարգն այլևս չի կարգավորվելու ռազմական օրենսդրական ակտերով: «Զորքեր» հասկացության փոխարեն ոստիկանության զորքերը վերանվանվելու է «ազգային գվարդիա»: Միեւնույն ժամանակ նշվում է, որ « ներքին գործերի նախարարության վերականգնումը չի կարող և չպետք է ասոցացվի կառավարության կառուցվածքում ուժերի կուտակման ոչ ժողովրդավարական և անվերահսկելի մի բևեռի ստեղծման գաղափարի կամ դառը փորձի հետ»։

Թեւան Պողոսյանը հիշում է՝ երբ Հայաստանում ներքին գործերի նախարարությունը վերացավ ու որպես առանձին միավոր ձեւավորվեց ոստիկանությունը, աշխարհում միտում կար՝ հստակեցնել ոստիկանության առանձնահահատկությունները։ Հայաստանում, ըստ Պողոսյանի, խնդիր էր դրված ոստիկանությունն առանձնացնել, որպեսզի այն սովետական միլիցիայի նման չընկալվի։

«Այդ ժամանակահատվածում էլ կար այն խոսակցությունը, որ որոշ ժամանակ հետո, երբ ամրապնդվի ընկալումը, որ այլեւս սովետական միլիցիա չի լինելու, հետո ապագայում կձեւավորվի մեկ նախարարութուն, որը կկոչվի ՆԳՆ, բայց, որին հանրությունն ավելի հանգիստ կվերաբերվի։ Այդ ժամանակներից ի վեր, տարբեր բարեփոխումներ էին տեղի ունենում ՝ անձնագրային բաժինն էր առանձնանում, հետո՝ միանում, տարբեր խնդիրներ էին փորձում լուծել եւ ունենք այն, ինչ ունենք»,-ասաց Թեւան Պողոսյանը՝ կրկին շեշտելով, որ ամենակարեւորը նոր գաղափարի իրականացման որակն է լինելու։

«Օրինակ, ոստիկանությունը պետք է ավելի մոտիկ լինի ժողովրդին, դրա համար ազգային գվարդիա ենք կոչում, իմ ընկալման մեջ ոստիկանությունը մոտիկ է լինելու ժողովրդին, եթե մարդու իրավունքները չեն խախտվելու, եթե հարգանք է լինելու, եթե ուժի կիրառում չի լինելու։ Այդ ժամանակ նրա անունը կլինի ոստիկանություն, ներքին զորքեր, թե ազգային գվարդիա, միեւնույնն է, մենք ընկալելու ենք, որ ոստիկանությունը ժողովրդին մոտիկ է։ Դրա համար նաեւ վարքագծային փոփոխություններ են հարկավոր»,-շեշտեց Թեւան Պողոսյանը։

Մեր զրուցակիցը հիշեց նախկինում գովազդվող «հրեշտակ» ոստիկաններին, որոնք պետք է օտար լեզուներին տիրապետեին, առաջին օգնության կանոններն իմանային, տարբերվեին իրենց նոր համազգեստով եւ այլն։ Սա էլ,ըստ Պողոսյանի, բարեփոխում էր, որից ոգեւորվում էինք, բայց երբեմն էլ լինում էին դեպքեր, երբ նրանք էլ էին կոպիտ գործում։

«Այս ամենը վկայում է, թե ինչ փուլեր ենք անցել։ Ժամանակին ներքին գործերի մեջ մտնում էր մեր քաղպաշտպանության համակարգը, հետո պարզվեց, որ անձերով պայմանավորված՝ կարող է քաղաքական որոշում կայացվել, հետո միացրեցին, հետո նորից առանձնացրեցին։ Ես չգիտեմ՝ վերջնական իմաստով այն ծառայությունները , որ մատուցվելու են հանրությանը, ինչ որակի են լինելու՝ փաստաթղթերին երկա՞ր ենք սպասելու, թե ոչ, անձնագրայինը, որը լավ է կառավարում, մտնելո՞ւ է այդ համակարգի մեջ, թե առանձին է լինելու։ Այս ամենի մեջ ինձ համար բուն կարեւոր խնդիրն այն է լինելու, որ եթե մենք պահպանելու ենք պառլամենտական համակարգը, լինելով պառլամենտական երկիր, պառլամենտը վերահսկելու է այդ նախարարությանը, այսինքն, քաղաքական պատասխանատու է լինելու, իսկ մնացածը արդեն կախված է լինելու որակական ծառայություններից՝ այդտեղ գաղափարը փոխվելո՞ւ է, թե ոչ»,-շեշտում է Պողոսյանը՝ կրկին հիշեցնելով, որ տեսել ենք շատ գեղեցիկ բարեփոխումներ, որոնք այդպես էլ մնացին թղթի վրա են մնացել ու քաղաքացու կյանքում իրական փոփոխություն չեն բերել։

Թեւան Պողոսյանը նախատեսվող բարեփոխումները դիտարկում է ոստիկանության համակարգում իրականացված բարեփոխումների շարունակականության տեսանկյունից։ Դիտարկմանը, թե ոստիկանության կողմից վերջին շրջանում իրականացված «ասֆալտին պառկեցնելու» գործողություններն արդյո՞ք համակարգում իրապես որակական փոփոխություններ իրականացնելու քաղաքական կամքի մասին կարող են վկայել, Թեւան Պողոսյանն արձագանքեց՝ բոլոր բացատրությունները պետք է ներկայացվեն հանրությանը, որի մոտ այլ հարցեր այլեւս չպետք է ծագեն։

«Բարեփոխումները միտված են այդ կարգի գործողություններից խուսափելուն։ Խոսքը ամեն մի անհատական դեպքի մասին չէ, պետք է համակարգ ձեւավորվի, որը թույլ չտա այդ տեսակի դեպքերը, որոնց հետ կապված հանրության մոտ կարծիք կձեւավորվի, որ ոստիկանությունը նույն սովետական է, որ այդ բաները այլեւս վերանան եւ մենք հասկանանք, որ ոստիկանությունը տալիս է այն ծառայությունները, որոնց համար մենք վճարում ենք։ Այդ ծառայությունը ոստիկանության մակարդակով կոչվում է անվտանգության էլեմենտ։ Մենք պետք է հասկանանք՝ արդյո՞ք այդ բարեփոխումները տեղ են հասնում»,-«Փաստինֆո»-ի հետ զրույցում եզրափակեց Թեւան Պողոսյանը։

Աղբյուր` Փաստինֆո