Փաստ ինֆո

Եթե այս քրեական գործը շենքի հետ համեմատենք, սկսվել է տանիքից՝ սկզբից մեղավոր են նշանակել, հետո ընտրել են հոդվածը, որից հետո աբողջ նյութերից փորձել են ներառել միայն այն նյութերը, որոնք իրենց կարծիքով ինչ-որ ապացուցողական բազա են ձևավորում։ ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ժամանակ այս մասին ասաց Ռոբերտ Քոչարյանը։

Նա նշեց՝ ամբողջ քրեական գործում կա ընդամենը երկու նյութ, երկու նամակ ԱԱԾ-ից. «Դուք պատկերացնու՞մ եք ՝ ինչ էր կատարվում ՀՀ-ում և հանկարծ այդ ժամանակ մեր ամենից կայացած կառույցներից մեկը որևէ վերաբերմունք, որևէ նյութ չունի այս իրադարձությունների վերաբերյալ։ Հնարավո՞ր է դրան հավատալ։ Այն պարագայում, երբ փետրվարի 24-ին հարուցված էր քրեական գործ սահմանադրական կարգի տապալման վերաբերյալ և այս քրեական գործում կա միայն այդ որոշումը՝ քրեական գործ հարուցելու մասին, և երկրորդ նամակը, որ այդ երեք հատորն ուղարկվել է քննչական հատուկ ծառայություն մարտի 2-ին։ Հնարավո՞ր է հավատալ, որ ԱԱԾ-ն որևէ տեղեկատվության չէր տիրապետում այդ ամբողջ ընթացքում։ Ուղղակի հնարավոր չի հավատալ կամ մարդ ուղղակի պետք է շատ տկար ուղեղի տեր լինի, որ հավատա՝ դա այդպես է» ,-ասաց Ռոբերտ Քոչարյանը։

Վերջինս հավելեց՝ բազմիցս դիմել են՝ տրամադրել Մարտի 1-ի նյութերի ամբողջ ծավալը։ Ռոբերտ Քոչարյանը նշեց, որ այն ժամանակ, երբ նախագահ է եղել, առնվազն շաբաթը մեկ անգամ ԱԱԾ տնօրենը զեկուցում էր իրեն. «Ես գիտեմ՝ ինչ էր ինքը զեկուցում։ Ես այս ելույթներից որևէ նյութ այս քրեական գործում չեմ տեսել, չկա։ Չեմ կասկածում, որ այդ նյութերը գուցե կան այն 600 հատորում, որոնք առանձնացված են կամ կան ԱԱԾ-ում, բայց որոնք չեն տրամադրվել այս քրեական գործի համար»,-նշեց Ռոբերտ Քոչարյանը։

ՀՀ երկրորդ նախագահը նկատեց՝ Վիքիլիքսի նյութերը կարդալիս տպավորություն է ստեղծվում, որ ԱՄՆ դեսպանատունը շատ ավելի ինֆորմացիա ուներ ներքաղաքական իրադարձությունների մասին, քան ԱԱԾ-ն. «Այն, ինչ այնտեղից ես կարդում եմ, այդ ամենն ինձ զեկուցվում էր։ Քրեական գործում՝ զրո։ Սա այն դեպքը չէ, որ դրա մասին բարձաձայնում ենք այստեղ՝ դատարանում։ Քննիչներին ամեն անգամ դրամասին ասում ենք։ Նույնիսկ մեզ չեն տրամադրել այդ 750 էջ 3 հատորը, որն ուղարկվել է քննչական մարմիններին»,-ասաց Ռոբերտ Քոչարյանը։

Վերջինս հիմնավոր կասկած ունի, որ այդ 600 հատորում կան բավարար նյութեր՝ 10 սպանությունները բացահայտելու համար։ ՀՀ երկրորդ նախագահը նկատեց՝ պարզապես չեն ուզում դա անել և պատճառներից մեկը կարող է լինել այն, որ դա կարող է մեկ ուրիշ տեղ տանել, ինչը կհակասի այս քրեական գործին.

«Կամ ներկայացնելու դեպքում հարցեր կառաջանան՝ արդյոք տուժողներն այս նիստին պետք է մասնակցեն, թե ոչ։ Այս երկու մոտիվացիան ինձ համար ակնհայտ է»,-ընդգծեց Ռոբերտ Քոչարյանը։

Ռոբերտ Քոչարյանի այս խոսքերից հետո նիստերի դահլիճում իրարանցում սկսվեց, որը կարճ ժամանակ անց ավարտվեց։
Ռոբերտ Քոչարյանը նշեց՝ գործը կարճելու համար ունեն մի մեծ փունջ փաստարկներ. «Հասկանում եմ նաև, որ Դուք անձամբ բավական դժվար կացության մեջ եք՝ հաշվի առնելով նաև դատավոր Դավիթ Գրիգորյանի ճակատագիրը։ Շատ ցավոտ եք տանում նման զուգահեռները։ Մենք Ձեզ հետևում ենք և տեսնում ենք, որ սա այն ցավոտ կետն է, որի հիշատակման պարագայում, ինչպիսի ռեակցիա եք տալիս»,-հավելեց Ռոբերտ Քոչարյանը։

Աղբյուր` Փաստինֆո