Փաստ ինֆո

Ոչ մեկ ՀՀ-ում և՛ օրենքով, և՛ դե ֆակտո, չի կարող խառնվել Երևանի քաղաքապետի և քաղաքապետարանի նշանակումների հարցով։ Դրա մեջ մտնում են բոլորը։ Լրագրողների հետ զրույցում այս մասին ասաց Երևանի քաղաքապետ Հայկ Մարությանը՝ պատասխանելով հարցին՝ արդյոք իր կինը խառնվում է քաղաքապետի գործերին։

«Թե՛ իմ կինը, թե՛ իմ ընկերները հենց առաջին օրվանից օգնում են, որպեսզի կարողանանք մեր բոլոր խոստումներն իրականացնենք։ Բոլորն ինձ օգնել են, օգնում են և օգնելու են»,-ընդգծեց Հայկ Մարությանը։

Ճշտող հարցին, թե ինչ հարցով է օգնում Հայկ Մարությանին իր կինը, քաղաքապետը նկատեց՝ իր ընկերները, կինը և ուղղակի անծանոթ մարդիկ օգնում են այն հարցերով, որոնց շրջանակներում կարողանում են։

Հարցին՝ իր կնոջ հարցով «Իմ քայլը» խմբակցության հետ նիստ եղել է, Հայկ Մարությանն ասաց. «Ես մեր նիստերի մասին ինֆորմացիա դուրս չեմ հանում, որովհետև դրանք փակ նիստեր են»,-նշեց Հայկ Մարությանը։

Վերջինս հավելեց, որ իր կինը և նրա ընկերները զրոյից ծրագիր են գրել, որպեսզի 5.3 մլն եվրոյի դրամաշնորհ լինի Երևան քաղաքին։ Քաղաքապետն ընդգծեց՝ նրանք այդ ծրագիրն իր խնդրանքով են գրել, ներկայացրել քաղաքապետարան. «Մեծ մրցույթում, որտեղ մասնակցել են բազմաթիվ քաղաքներ, հաղթել ենք այս մրցույթը և 5.3 մլն դրամաշնորհ է լինելու Երևանին։ Ծրագիրը վտանգավոր թափոնների մասին է։ Սրա մասին մեծ նյութ է եղել։ Այս վերջերս էլ ստորագրեցինք

ԵՄ-ի դեսպանի հետ հուշագիր, որ այս ծրագիրն անելու ենք։ Սա կարևորագույն ծրագիրներից է, որին երբևիցե մոտեցում էլ չի եղել։ Վտանգավոր թափոնների մասին խոսք էլ չի գնում։ Բոլոր թափոնները տանում և թափում են մի տեղ։ Այս ծրագրով լուծելու ենք այդ հարցը»,-հավելեց Հայկ Մարությանը՝ ընդգծելով, որ իրենց ընկերներն ով ինչով կարողանում, օգնում են։

Դիտարկմանը, որ «Իմ քայլը» խմբակցությունը դժգոհում է, քաղաքապետն ասաց, որ ոչ ոք չի դժգոհում. «Եթե կա որևիցե մեկը, ով դժգոհում է, որ իմ ընկերը լինի, կինս լինի, եղբայրս լինի, անծանոթ մեկը լինի, օգնում է Երևան քաղաքին, կարծում եմ այդ մարդը խնդիրներ ունի քաղաքի հետ»,-ընդգծեց քաղաքապետը։

Աղբյուր` Փաստինֆո