Փաստ ինֆո

IQOS ընկերություն–Արսեն Թորոսյան հակամարտությունը նոր նբերանգներ է ձեռք բերում։ Ընկերության հայաստանյան ներկայացուցչության հորդորով Iqos օգտագործողները ստորագրահավաք են սկսել ընդդեմ «Ծխախոտային արտադրանքի օգտագործման բացասական ազդեցության նվազեցման և կանխարգելման մասին» օրինագծի, որն առաջին ընթերցմամբ ընդունվել է եւ ներառված է ԱԺ նիստերի օրակարգում։

IQOS-ի սիրահարներն ահազանգում են, թե նախագծի ընդունումից հետո IQOS-ը կարգելվի հանրային վայրերում եւ կոչ են անում կառավարությանը՝ օրինագիծը չտարածել IQOS սարքի
օգտագործման վրա։

Կառավարության ներկայացրած նախագծով, հիշեցնենք արգելվում է հանրային վայրերում և փակ տարածքներում ծխելը՝ ներառյալ նաեւ էլեկտրոնային ծխախոտները։

Մինչեւ ստորագրահավաքը «Ֆիլիպ Մորրիս Արմենիա» ընկերությունն էր ԱԺ պատգամավորներին կոչ արել դեմ քվեարկել նախագծին, ինչին առողջապահության նախարար Արսեն Թորոսյանը սուր էր արձագանքել՝ հայտարարելով, որ «ինդուստրիան» «պատերազմ» է հայտարարել քաղաքացիների առողջության դեմ։ Իր հերթին, Արսեն Թորոսյանի գրառմանը պատասխանել էր Ֆիլիպ Մորիս Արմենիայի ղեկավար Նատալյա Մայորովան։

IQOS–Արսեն Թորոսյան փոխհրաձգությունը ուշագրավ է ոչ միայն նախարարի՝ հակածխախոտային արշավի տեսանկյունից։ Բանն այն է, որ IQOS-ը վայելում է
վարչապետ Փաշինյանի «հոգածությունը»։ Սարքավորումներն ու դրա միջուկները Հայաստան է ներկրում նախկին ՀՀԿ-ական պատգամավոր Արման Սահակյանին պատկանող ընկերությունը, որը 2018-ին արագ կողմնորոշվեց եւ առաջիններից լքեց «խորտակվող նավը»՝ դուրս գալով ՀՀԿ-ից եւ հավատարմության երդում տալով հեղափոխական իշխանությանը։

Վարչապետի տիկին–առողջապահության նախարար լուռ հակամարտության մասին մամուլը վաղուց է գրում։ Թերեւս IQOS-ի շուրջ կրքերի թեժացումն էլ այս հակամարտության դրսեւորումներից մեկն է։

Բանն այն է, որ Արման Սահակյանին պատկանող «Պրեսստենդ» ընկերությունն է ապահովում Փաշինյանների ընտանիքին պատկանող «Հայկական ժամանակ»-ի 100 տոկոսանոց իրացումը, որի գլխավոր խմբագիրը, ինչպես հայտնի է Աննա Հակոբյանն է։

Ի դեպ, ուշագրավ է, որ Արման Սահակյանի նկատմամբ վարչապետի վերաբերմունքը անուղղակիորեն նաեւ հրապարակային է դրսեւորվել։ Անցած տարի կառավարության նիստերից մեկի ժամանակ Փաշինյանը նյարդայնացավ, երբ անդրադարձ եղավ ծխախոտի կատեգորիայում գտնվող, բայց ծխախոտ չհամարվող IQOS –ին ու նրա միջուկին ։

Բանն այն է, որ էլիտար արտադրանքը դասակարգված էր որպես «ծխախոտի արդյունաբերական փոխարինիչ» և ակցիզավորվում էր զանգվածով՝ մեկ կիլոգրամի համար 1500 դրամ, մինչդեռ 2019-ին ցանկացած ծխախոտի տուփի ակցիզային հարկը կազմում էր 167.4 դրամ, իսկ Iqos-ի միջուկի համար, ըստ հաշվարկների՝ ընդամենը 10 դրամ։

Աղբյուր` Փաստինֆո