Փաստ ինֆո

Վերաքննիչ քրեական դատարանում՝ դատավոր Նարինե Հովակիմյանի նախագահությամբ, շարունակվում է ՍԴ նախագահ Հրայր Թովմասյանի սանիկ Նորայր Փանոսյանի նկատմամբ կալանավորումը որպես խափանման միջոց ընտրելու մասին դատարանի որոշման դեմ բողոքի քննությունը։

Նախորդ դատական նիստին պաշտպանական կողմը ներկայացրել է բողոքը։ Այս դատական նիստին դատարանը կլսի քննիչի և դատախազի առարկությունները՝ ներկայացված բողոքի մասին։

Ավելի վաղ տեղեկացրել ենք, որ Երևանի ընդհանուր իրավասության դատարանը՝ դատավոր Գագիկ Պողոսյանի նախագահությամբ, 2020թ. հունվարի 9-ին բավարարել էր ՍԴ նախագահ Հրայր Թովմասյանի սանիկ Նորայր Փանոսյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Նորայր Փանոսյանի փաստաբան Տիգրան Աթանեսյանն ասել էր. «Ցավում եմ, որ դատական համակարգը շատ ավելի տխուր վիճակում է քան Ռոբերտ Քոչարյանի և Սերժ Սարգսյանի օրոք։ Այն պարզապես ոչնչացված է։ Կամակատարային, խայտառակ որոշում է կայացվել մեր պաշտպանյալին կալանավորելու, որն իհարկե կբողոքարկենք»։ Փանոսյանին կալանավորելու դատարանի որոշման դեմ փաստաբանները վերաքննիչ բողոք են ներկայացրել։ Բողոքի քննությունը մակագրվել էր դատավոր Ռուբիկ Մխիթարյանին, ով ինքնաբացարկ էր հայտնել։ Այնուհետև բողոքի քննությունը մակագրվել էր դատավոր Նարինե Հովակիմյանին։ Հիշեցնենք, որ Նորայր Փանոսյանը մեղադրվում է ՀՀ ՔՕ-ի 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։

Հեղինակ՝ Իզաբել Սահակյան

Աղբյուր` Փաստինֆո