Փաստ ինֆո

«Սա շատ կարևոր նախագիծ է, ուզում եմ հիշեցնել, որ քանիցս մենք՝ պատգամավորներս, իշխանություն-ընդդիմություն առճակատումների ժամանակ, հանրային էսկալացիաների ժամանակ , երբ ձերբակալվել են տարբեր անձինք, փորձել ենք գնալ ՔԿՀ-ներ, մեզ ասել են մտեք շենք, հրավիրել են պետի առանձնասենյակ , ասել՝ կարող եք թեյ խմել, բայց կալանավորին հանդիպել չեք կարող»,-այս մասին այսօր ԱԺ-ում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը, անդրադառնալով «Ձերբակալված և կալանավորված անձանց պահելու մասին» ՀՀ օրենքում լրացումներ կատարել մասին ԼՀԿ-ի առաջարկին։

Նա նշեց, որ եթե տեխնիկական որոշակի խնդիրներ անգամ կան, ապա նախագիծն անպայմանորեն պետք է առաջին ընթերցմամբ ընդունվի և մինչև երկրորդ ընթերցում տեխնիկական ձևակերպումները կշտկվեն։

«Հնարավոր չէ պատգամավորի մուտքն արգելել որևէ ՔԿՀ։ Շատ դեպքերում քննիչի արգելքի որոշումն էլ չի լինում, ասում ենք ցույց տվեք քննիչի արգելքը, ասում են չկա, քննիչի մոտ է»,-ասաց Զոհրաբյանը։

ԲՀԿ մեկ այլ պատգամավոր Գևորգ Պետրոսյանն էլ ավելացրեց, որ չպետք է մոռանալ այն մասին, որ ՀՀ Սահմանադրության համաձայն խորհրդարանը՝ ի դեմս մշտական հանձնաժողովների, խորհրդարանական վերահսկողություն է իրականացնում գործադիր իշխանության նկատմամբ, իսկ ՔԿՀ-ն գործադիր իշխանության ներսում գործող կառույց է։

«Այդ ո՞ր պատգամավորն է պարապ, գնա դուռը ծեծի, ասի «Բարև ձեզ, ես եկա», ասեն, որ մուտք գործեցիր, առաքելությունդ ավարտել ես։ Հո այնտեղ չենք գնում վարագույրների մաքրությունը ստուգենք կամ գարշահոտ պետքարանները տեսնենք, մենք գնում ենք այս կամ այն կալանավորի կամ ձերբակալվածի վիճակը պարզենք։ Որպեսզի այդ մուտք գործելու իրավունքն ինքնանպատակ չընկալվի, պետք է թույլ տալ, որ պատգամավորը տեսակցի այն անձի հետ, ում ձերբակալման կամ կալանքի պայմանները տեսնելու համար մուտք է գործել կալանավայր»,-ասաց Պետրոսյանը։

ԱԺ «Իմ քայլը» խմբակցության պատգամավոր, պետաիրավական հարցերի մշտական հանձնաժողովի նախագահ Վլադիմիր Վարդանյանն էլ իր հերթին ասաց, որ նախագծում խնդիրն ավելի շատ հայեցակարգային է. «Այո, միանշանակ, բոլորը կողմ են արտահայտվել, որ պատգամավորը պետք է հնարավորություն ունենա հանդիպել, բայց տեսակցություն ինստիտուտն առանձին է և այն առանձին եղանակով է արվում։ Մենք առաջարկեցինք հեղինակին այս նախագիծը հետաձգել, աշխատել, նա, ըստ էության, չհամաձայնեց, բայց հաշվի առնելով հարցի հնչեղությունն ու այն, որ այս կարգավորումները տարածվում են ոչ միայն ԱԺ պատգամավորի, այլև ԱԺ նախագահի, վարչապետի, ՀՀ նախագահի վրա, առաջարկում ենք դա քննարկել լիագումար նիստի օրակարգում ու հասկանալ իրավիճակը»։

Աղբյուր` Փաստինֆո