Փաստ ինֆո

Կենտրոնական ընտրական հանձնաժողովը կիրառում է մի քանի օրենքներ, իսկ ԱԺ-ում պատգամավորների հետ տեղի ունեցած քննարկումը վերաբերում էր օրենսդրական խնդիրների, որոնք առկա են մեր կողմից կիրառելի օրենքներում։ Լրագրողների հետ զրույցում այս մասին ասաց Կենտրոնական ընտրական հանձնաժողովի նախագահ Տիգրան Մուկուչյանը։

Անդրադառնալով նախկինում ընդդիմադիր Նիկոլ Փաշինյանի՝ ԿԸՀ-ի, այնպես էլ հանձնաժողովի և իր գործունեության վերաբերյալ քննադատություններին , Տիգրան Մուկուչյանն արձագանքեց. «Մենք այսօր ունենք մեկ առաքելություն, ընտրական օրենսգրքի պահանջներին լիակատար համապատասխան կազմակերպել գործընթացը։ Մեր թիվ 1 խնդիրը դա է և այսօր մեր բոլոր գործընթացները փորձում ենք կազմակերպել այն հաշվով, որպեսզի պատշաճ, օրենքով սահմանված բոլոր ժամկետների պահպանմամբ տեղի ունենա հանրաքվեն։ Դա է թիվ 1 խնդիրը, որով առաջնորդվում է հանձնաժողովը»,-ասաց Տիգրան Մուկուչյանը։
Դիտարկմանը, որ քարոզչամեքենան ամենաբարձր մակարդակով արդեն գործի է դրվել, Տիգրան Մուկուչյանը նկատեց՝ ամբողջ խնդիրը վերաբերում է նրան, որ անգամ հանրաքվեի մասին օրենքում է գրված, որ օրենքով սահմանված ժամանակահատվածից դուրս քարոզչություն կարող է իրականացվել. «Քարոզչության ժամանակահատվածը սահմանվում է այն հաշվով, որպեսզի որոշ ռեսուրսներ, որոնք սահմանափակ են, դրանց նկատմամբ կիրառվեն որոշակի կանոնակարգումներ և այդ ժամանակահատվածում պահպանվի հավասարություն կողմերի համար։ Քարոզչության ժամանակահատված ասելով՝ միշտ պետք է նկատի ունենանք այն հանգամանքը, որ դա այն ժամանակահատվածն է, որի ընթացքում գործում են որոշակի կանոնակարգումներ, որի ընթացքում ընտրական օրենսգրքով սահմանված իրավակարգավորումները դառնում են լիարժեք կիրառելի։ Նույն օրենքը նաև ամրագրում է, որ այդ ժամանակահատվածից դուրս իրականացվող քարոզչությունը չի որակվում այնպիսին, ինչպիսին ամրագրված է օրենքում»,-նշեց ԿԸՀ նախագահը։

Անդրադառնալով ընտրությունների համար նախատեսված գումարին՝ ԿԸՀ նախագահն ասաց, որ այժմ հաշվարկն իրականացվում է, սակայն կարծում է՝ այն կլինի նույնը, ինչ նախորդ ընտրությունների ժամանակ էր. «Ըստ էության գործառույթների առումով շատ տարբերություններ այստեղ առկա չեն։ Եթե նկատի ունենանք, որ նվազագույն աշխատավարձի հետ կապված ունենք որոշակի աճ, իսկ հանձնաժողովներում ընդգրկված քաղաքացիների և տեխնիկական սարքավորումը սպասարկող մասնագետների աշխատավարձերի հաշվարկի համար բազային է ընդունվում հենց նվազագույն աշխատավարձը։ 2018-ի ընտրություններին մոտ 2.5-2.7 մլրդ դրամ էր ծախսվել։ Ենթադրում եմ կլինի նույնը»,-հավելեց Տիգրան Մուկուչյանը։

Աղբյուր` Փաստինֆո