Փաստ ինֆո

«Չերյոմուխա 7» տեսակի զենքն արգելված զենք էր, ո՞վ հրաման տվեց, որ այդ զենքը հանեին զորամասից։ Այս մասին ՀՀ երկրորդ նախագահի և մյուսների գործով դատական նիստին ասաց տուժողի իրավահաջորդ Սարգիս Քլոյանը՝ նշելով, որ առ այսօր չկա մեղադրյալ։

«Չորս ոստիկան, երեք զոհ։ Չեն կարողանում բացահայտել»,- ասաց Քլոյանը։

Նրա խոսքով՝ իր որդուն խփել են 40 մ հեռավորությունից, 90 աստիճան անկյան տակ, ձախ աճուկին։

«Գնացել եմ երրորդ հիվանդանոց։ Վիրահատության ժամանակ դեռ այդ փամփուշտը մնացել էր իմ տղայի աճուկի մեջ, չէր բացվել, վիրահատության ժամանակ պայթել է իմ տղայի փորի մեջ։ ։ Եթե լիներ ռազմական բժիշկ, համոզված եմ՝ իմ տղան կենդանի կլիներ։ Այն ժամանակ ես այնտեղ կանգնած էի, լուսամուտը բժիշկները բացեցին և վիրահատական սենյակից դուրս թռան միջանցք։ Խեղդվում էին։ Գազ էր և նրանց աչքերից արցունք էր թափվում։ Թունավոր զենք էր դա կոչվում։ Հիմա ես տարին 12 անգամ գնում եմ այն վայրը, որտեղ գնացել եմ քննիչի հետ, քննիչը ցույց է տվել՝ սա քո տղայի արյան լճակն է։ Ես այդ ժամանակ կանգնել եմ իմ տղայի արյան լճակի վրա։ Խորապես ուսումնասիրել եմ բորդյուրները, պատը, Ձկան խանութի մոստի վրա։ Ոչ մի հետք չկա։ Չկա փոս ընկած տեղ, չկա սևացած տեղ, չկա ճաքած տեղ»,- ասաց Քլոյանը՝ նշելով, որ, եթե գազային նռնակը կպնում է պատին, ապա անմիջապես բացվում է, ինչը մարդու կյանքի համար վտանգ չի առաջացնում։

«Փաստինֆո»-ն ավելի վաղ տեղեկացրել է, որ նախաքննական մարմինը դեռեւս 2008-2009 թթ. պարզել էին այն ոստիկանների շրջանակը, որոնք 2008 թվականի մարտի 1-ի իրադարձությունների ժամանակ կիրառել են հատուկ միջոց համարվող «Չերյոմուխա 7» ու 4 ոստիկանի առաջադրել մեղադրանք, սակայն գործը դատարան չի ուղարկվել, քանի որ ոչ միայն ներպետական, այլ նաեւ միջազգային որեւէ փորձագետ չկարողացավ նույնականացնել, թե որ ոստիկանի կողմից կիրառված հատուկ միջոցի հետեւանքով են արձանագրվել 3 զոհերը։

Աղբյուր` Փաստինֆո